Parbhani Loksabha Election 2024 News : परभणी लोकसभा मतदार संघ निवडणुकीत शिवसेनेचे (उबाठा) संजय जाधव हे सलग तिसऱ्यांदा विजयी झाले. यापूर्वीच्या (२०१४ व २०१९) निवडणुकीच्या तुलनेत यंदा (२०२४) जाधव यांना सर्वाधिक म्हणजे ६ लाख १ हजार ३४३ (४५.१७ टक्के) मते मिळाली.

तर त्यांचे प्रतिस्पर्धी राष्ट्रीय समाज पक्षाचे महादेव जानकर यांना ४ लाख ६७ हजार २८२ मते (३५.१० टक्के) मिळाली. मागील दोन निवडणुकीच्या तुलनेत जाधव यांच्या मताधिक्यात मोठी वाढ झाली असून यंदा जानकारांपेक्षा १ लाख ३४ हजार ६१ एवढ्या मताधिक्यांने ते विजयी झाले.

निवडणुकीत परभणी मतदार संघात विविध पक्ष तसेच अपक्ष मिळून एकूण ३४ उमेदवार होते. जाधव व जानकर यांच्यात थेट लढत झाली. वंचित बहुजन आघाडीचे पंजाब डख यांना ९५ हजार ९६७ मते (७.२१ टक्के) मते मिळाली.

अन्य उमेदवारांना १ हजार २४६ ते १५ हजार ३९५ दरम्यान मते मिळाली. विकासाच्या मुद्द्यावरून जाधव यांना घेरण्यात विरोधक असफल ठरले. केवळ ओबीसींच्या मतांवर आपण विजयी होऊ हा जानकर यांचा आत्मविश्वास फोल ठरला.

भारतीय जनता पक्षाने जानकरांच्या मागे मोठे पाठबळ उभे केले. परंतु मतदार संघाबाहेरचा उमदेवार लादल्यामुळे भाजप तसेच मित्र पक्षांतील इच्छुक नाराज झाले. गंगाखेड वगळता अन्य मतदार संघांत रासपच्या कार्यकर्त्यांचे जाळे नव्हते. जाधव यांचा गावागावांतील दांडगा जनसंपर्क तसेच शिवसेनेतील फुटीनंतर पक्षप्रमुख उद्धव ठाकरे यांच्यावरील निष्ठा जनतेला भावली.

भाजपच्या विरोधातील एकगठ्ठा मते जाधवांना मिळविण्यात यश आले. चुरशीच्या लढतीचे अंदाज लावले जात होते. परंतु टपाली मतदानासह पहिल्या फेरीपासून जाधवांनी आघाडी कायम राखली. जानकरांना शेवटच्या काही फेऱ्यांत मिळालेेले मताधिक्य पराभव टाळण्यासाठी अपुरे ठरले.

परभणी लोकसभा निवडणुक २०२४ तुलनात्मक मतदान स्थिती

विधानसभा मतदारसंघ संजय जाधव महादेव जानकर मताधिक्य

जिंतूर १००५०० ८७८५५ १२६४५

परभणी १०८३७४ ६५९७४ ४२४००

गंगाखेड १०१११७ १०७८२८ ६७११

पाथरी १११९०६ ८२७३५ २९१७१

परतूर ८५०६० ५९७१६ २५३४४

घनसावंगी ८९९१४ ५९६५६ ३०२५८

टपाली ४४७१ ३५१८ ९५४

२०१४ लोकसभेची स्थिती

२०१४ च्या लोकसभा निवडणुकीत शिवसेनेचे संजय जाधव (प्राप्त मते ५७८४५५) यांनी राष्ट्रवादी कॉँग्रेसचे विजय भांबळे (प्राप्त मते ४५१३००) यांचा १ लाख २७ हजारांवर मतांनी पराभव केला होता. २०१९ निवडणुकीत जाधव (प्राप्त मते ५३८९४१) यांनी राष्ट्रवादी काँग्रेसचे राजेश विटेकर (प्राप्त मते ४९६७४२) यांचा ४२ हजारांवर मतांनी मात केली होती.