Amravati News: ‘महिलांसाठी कमवा व शिका योजना’, अंशकालीन महिला स्त्री परिचरांना गणवेश, दुर्धर आजारी रुग्णांच्या सहायता निधीमध्ये वाढ, बेरोजगारांना ७० टक्के अनुदानावर स्वयंरोजगारासाठी विविध योजना यांसह इतर अनेक महत्त्वाच्या नावीन्यपूर्ण योजनांचा यंदाच्या मिनीमंत्रालयाच्या म्हणजेच जिल्हा परिषदेच्या बजेटमध्ये समावेश करण्यात आला आहे.

मुख्य कार्यकारी अधिकारी संजिता महापात्र तसेच मुख्य वित्त व लेखाधिकारी हेमंत ठाकरे यांनी जिल्हा परिषदेचा अर्थसंकल्प सादर केला. २८ कोटी ६८ लाख ९१ हजार ६२९ रुपयांचा मूळ व २०२५-२६ करिता २९ कोटी ७२ लाख ८७ हजार रुपयांच्या अर्थसंकल्पाला मंजुरी प्रदान करण्यात आली.

जिल्हा परिषदेच्या डॉ. पंजाबराव देशमुख सभागृहात मुख्य कार्यकारी अधिकारी संजिता महापात्र यांनी अर्थसंकल्पातील तरतुदींचे वाचन केले. कमवा व शिका योजनेंतर्गत यंदा तालुकानिहाय युवतींची निवड केली जाणार असून त्यांना संगणकीय तंत्रज्ञानाचे प्रशिक्षण दिले जाणार आहे.

विशेष म्हणजे हे प्रशिक्षण देत असतानाच सकाळी नऊ ते सायंकाळी पाच यावेळेत प्रशिक्षणार्थी जिल्हा परिषदेच्या विविध विभागांतील कर्मचाऱ्यांना कामात मदत करणार आहेत. ही एक वैशिष्ट्यपूर्ण योजना असल्याचे मुख्य कार्यकारी अधिकारी म्हणाल्या. सर्वांत महत्त्वाची बाब म्हणजे हृदयरोग व कर्करुग्णांच्या उपचारासाठी दरवर्षी राखीव असलेली ५० लाख रुपांची तरतूद यंदा वाढविण्यात आली असून ती दीड कोटींपर्यंत करण्यात आली आहे.

त्याचा लाभ अनेक रुग्णांना होणार आहे. अंशकालीन महिला स्त्री परिचरांना आतापर्यंत गणवेश देण्यात आले नव्हते, त्यांची ती मागणी अनेक दिवसांपासूनची होती, ती पूर्ण करण्यात आली असून त्यासाठी निधी राखीव ठेवण्यात आला आहे.