Mumbai News: देशी गाईंच्या संख्यात्मक आणि गुणात्मक वाढ करण्यासाठी २२ जुलै रोजी शुद्ध देशी गोवंश जतन व संवर्धन दिन साजरा करण्यात येणार आहे.राज्य सरकारने गोसेवा आयोगाच्या पत्रानंतर आदेश काढले असून राज्यभर हा दिवस साजरा केला जाणार आहे. या दिवशी चर्चासत्रे, प्रदर्शने, शिबिरे आणि स्पर्धांचे आयोजन करण्यात येणार आहे, असेही शासन आदेशात म्हटले आहे.

आदेशात म्हटले आहे, की देशी गायीच्या दुधाची उपयुक्तता तसेच शेण आणि गोमूत्राचे महत्त्व विचारात घेऊन गाईस कामधेनू असे संबोधण्यात येते. राज्यातील वेगवेगळ्या भागांत वेगवेगळ्या देशी जातीच्या गाई आढळतात.

मराठवाड्यात देवणी, लाल कंधारी, पश्‍चित महाराष्ट्रात खिल्लार, उत्तर महाराष्ट्रात डांगी, विदर्भात गवळाऊ, कोकणात कोकण कपिला अशा देशी गोवंश जाती आहेत. राज्यातील देशी गायींच्या संख्येत दिवसेंदिवस घट होत आहे. त्यामुळे संवर्धनासाठी राज्य सरकारने याआधी देशी गाईला राज्यमाता गोमाता असा दर्जा दिला आहे.

देशी गायींच्या संख्येत घट होण्यामागे संकरित गायींच्या तुलनेत असलेली कमी उत्पादनक्षमता आणि प्रजननक्षमता ही कारणमीमांसा विचारात घेऊन देशी गाईंची संख्यात्मक वाढ करण्याबरोबरच गुणात्मक वाढ करण्यासाठी त्यांची प्रजननक्षमता व उत्पादनक्षमता वाढवून उच्च वंशावळीच्या देशी गाई निर्माण करण्यास प्रोत्साहन देण्याची गरज आहे. या पार्श्‍वभूमीवर देशी गोवंश जतन आणि संवर्धन दिन साजरा करण्यास मान्यता देण्यात आली आहे.

२२ जुलै रोजी चर्चासत्रे, प्रदर्शने, शिबिरे, स्पर्धा यांचे आयोजन करण्यात येणार आहे. यानिमित्ताने देशी गाईंच्या संख्येत वाढ करण्याबरोबरच त्यांची उत्पादनक्षमता आणि प्रजननक्षमता वाढविण्यासाठी आधुनिक तंत्रज्ञानाचा वापर करण्यास प्रोत्साहन देण्यात येणार आहे. त्याबरोबरच देशी गाईंच्या संवर्धनाचे महत्त्व तसेच पशुजन्य उत्पादनांचे महत्त्व ग्राहकांना पटवून देऊन देशी गाई पशुपालकांना बाजारपेठ उपलब्ध करून देणे गरजेचे आहे. यासाठी हा दिवस उपयुक्त ठरेल असे आदेशात म्हटले आहे.