Thane News : जिल्हा परिषद ठाणेअंतर्गत कृषी विभागातील ई-कार्ड योजनेमुळे शेतकऱ्यांच्या आर्थिक उत्पन्नात वाढ होणार असल्याचे प्रतिपादन केंद्रीय राज्यमंत्री कपिल पाटील यांनी केले.

भिवंडी येथील दिवे अंजूर येथे शेतकरी बचत गटांना ई- कार्ट लोकार्पण सोहळा पाटील यांच्या हस्ते करण्यात आले. त्यावेळी ते बोलत होते.

जिल्हा परिषद कृषी विभागामार्फत सेस फंडातून पद्मश्री सिंधुताई सपकाळ स्वाभिमान योजनेंतर्गत बचत गट यांना ई-कार्ट पुरविणे ही नावीन्यपूर्ण योजना राबविण्यात येत आहे.

योजनेंतर्गत शेतकरी बचत गटांनी स्वत: पिकवलेला भाजीपाला थेट ग्राहकांपर्यंत विकण्याची संधी उपलब्ध करून देण्यात येत आहे. बचत गटांना स्वत:चे वाहन उपलब्ध झाल्याने वेळेची बचत होईल, व इतर कामासाठी देता येईल.

वाहनामुळे भाजीपाला स्वच्छ व ताजा राहून भाजीपाला विक्रीचा पूर्ण मोबदला शेतकरी बचत गटांना होणार आहे. शेतकऱ्यांचे प्रश्न समजून विविध विभागांच्या योजनांचे अभिसरण करून लाभ द्यावा, अशा सूचना पाटील यांनी केल्या.