Pune News : भारतीय कृषी संशोधन परिषदेच्या पुष्पसंशोधन संचालनालयाच्या अत्याधुनिक संशोधन प्रयोगशाळेचे उद्‌घाटन गुरुवारी (ता. २६) परिषदेचे महासंचालक डॉ. हिमांशू पाठक यांच्या हस्ते दुपारी एक वाजता होणार आहे, अशी माहिती संचालनालयाचे संचालक डॉ. के. व्ही. प्रसाद यांनी दिली.

ही प्रयोगशाळा उभारण्यासाठी कृषी संशोधन परिषदेच्या वतीने चार कोटी रुपयांचा निधी दिला आहे. प्रयोगशाळेमुळे आता विविध फूल पिकांवर अत्याधुनिक संशोधन करण्यास मदत करेल. यामुळे जैवतंत्रज्ञान, जिनोम एडिटिंग, मूल्यवर्धन, नैसर्गिक ऑइल्स, नैसर्गिक रंगसारख्या नवीन तंत्रज्ञानाचा वापर फूल पिकांमध्ये करणे शक्य होणार असल्याचे डॉ. प्रसाद यांनी सांगितले.

पुष्पसंशोधन संचालनालय गेल्या १५ वर्षांपासून पुण्यामध्ये विविध फुलांवर संशोधन आणि नवीन वाण विकसित करत आहेत. संचालनालयाच्या प्रक्षेत्रावर २०० पेक्षा अधिक गुलाब, १५० पेक्षा अधिक शेवंतीच्या आणि गुलछडी, ग्लॅडिओलस सोबत विविध फुलांवर संशोधन करण्यात येत आहे.