Chhatrapati Sambhajinagar News : मराठवाड्यातील ८७७ लघू, मध्यम, मोठ्या प्रकल्पांसह गोदावरी, तेरणा, मांजरा, रेणा नदीवरील बंधाऱ्यांमध्ये केवळ १२ टक्के उपयुक्त पाणीसाठा शिल्लक आहे. त्यामध्येही ७५ मध्यम प्रकल्पांत केवळ ६ टक्के उपयुक्तपणे उरले असून १५२ लघूउद्योग प्रकल्प कोरडे पडले आहेत.

मराठवाड्यातील ११ मोठ्या प्रकल्पांत १५ टक्के उपयुक्त पाणीसाठा शिल्लक आहे. मोठ्या प्रकल्पांपैकी जायकवाडीत केवळ ६ टक्के उपयुक्त पाणीसाठा शिल्लक आहे. सिद्धेश्वर, माजलगाव, सीना कोळगाव, निम्न तेरणा हे प्रकल्प मृत्तसाठ्यात गेले आहेत. मांजराही मृतसाठ्याच्या उंबरठ्यावर आहे.

येलदरीत २९ टक्के, ऊर्ध्व पेनगंगामध्ये ३६ टक्के, निम्न मनारमध्ये २५ टक्के तर विष्णुपुरी २५ टक्के उपयुक्त पाणीसाठा शिल्लक आहे. जालना जिल्ह्यातील ७, लातूरमधील ८ प्रकल्पांत प्रत्येकी तीन टक्के उपयुक्त पाणी आहे.

धाराशिव जिल्ह्यातील १७ मध्यम प्रकल्पांत केवळ दोन टक्के, नांदेडमधील ९ मध्यम प्रकल्पांत १८ टक्के तर छत्रपती संभाजीनगरमधील १६ मध्यम प्रकल्पांत ४ टक्के उपयुक्त पाणीसाठा शिल्लक आहे. परभणीमधील दोन्ही मध्यम प्रकल्पांत उपयुक्त पाण्याचा थेंब नाही.

सहा मध्यम प्रकल्प कोरडे

कोरड्या पडलेल्या सहा मध्यम प्रकल्पांत बीडमधील तीन, धाराशिवमधील दोन व जालन्यातील एका प्रकल्पाचा समावेश आहे. ३७ मध्यम प्रकल्पांतील पाणीसाठा जोत्याखाली गेला आहे. त्यामध्ये जालना व बीड मधील प्रत्येकी पाच, छत्रपती संभाजीनगरमधील ११, लातूरमधील तीन, धाराशिवमधील दहा, नांदेडमधील एक, परभणीतील दोन मध्यम प्रकल्पांचा समावेश आहे.

१४६ लघू प्रकल्प कोरडे

७५० लघू प्रकल्पांपैकी १४६ लघू प्रकल्प कोरडे पडले आहेत. त्यामध्ये धाराशिवमधील ६८, बीडमधील ४९, लातूरमधील ११ व छत्रपती संभाजीनगरमधील १८ प्रकल्पांचा समावेश आहे. ३२८ लघू प्रकल्पांतील पाणीसाठा जोत्याखाली गेला असून त्यामध्ये सर्वाधिक ९५ लघू प्रकल्प धाराशिवमधील आहेत.

त्या पाठोपाठ लातूरमधील ७७, बीडमधील ४८, जालनातील १४, छत्रपती संभाजीनगरमधील ३६, नांदेडमधील २६, परभणी मधील १८, हिंगोलीतील १४ लघू प्रकल्पांचा समावेश असल्याची माहिती जलसंपदा विभागाकडून देण्यात आली.