Khalapur News : विधानसभा निवडणुकीच्‍या रणधुमाळीत शासकीय यंत्रणा कामाला लागली आहे. याचा फायदा घेत खालापुरातील मांगूर उत्पादकांनी धामणी गावाच्या हद्दीत राजरोस मांगूर माशांचे उत्पादन सुरू केले असल्याचे सांगण्यात येत आहे. यासंदर्भात स्‍थानिकांकडून तक्रारी करण्यात आल्या आहेत, मात्र आचारसंहिता, तसेच निवडणुकीच्‍या कामात अधिकारीवर्ग व्‍यग्र असल्याचे सांगण्यात येत आहे.

मानवी आरोग्यास घातक असलेल्या विदेशी मांगूर माशांच्या मत्स्य संवर्धनावर राष्ट्रीय हरित लवाद यांच्या आदेशान्वये बंदी घालण्यात आली आहे, मात्र या माशांचे प्रजनन खालापूर तालुक्यात मोठ्या प्रमाणात केले जात आहे. गेल्या वर्षी मत्स्य विभाग रायगड यांनी स्थानिक, समाजसेवी संस्थांच्या तक्रारीनंतर कारवाई केली, परंतु कारवाईत सातत्य नसल्याने माशांचे प्रजनन अद्याप खालापुरात सुरू आहे.

सर्वात गंभीर बाब म्हणजे पाताळगंगा नदीलगत अनेक तलाव असून त्‍यामध्ये मोठ्या प्रमाणात मांगूर माशांची पैदास केली जात आहे. सडलेले खाद्य मांगूर माशांना खायला दिले जाते. त्‍यामुळे दुर्गंधीने सर्व परिसर भरून जातो. शिवाय तलावातील घाण पाणी नदीपात्रात सोडले जात असल्याचे स्‍थानिकांकडून सांगण्यात येत आहे. त्‍यामुळे पाताळगंगा प्रदूषित होत आहे. शिवाय मांगूर मासा इतर लहान माशांना मोठ्या प्रमाणावर खात असल्याने जलजीवांना धोका वाढला आहे.

त्‍यातच तालुक्यातील अनेक ग्रामपंचायतीच्या पिण्याच्या पाण्याची योजना पातळगंगा नदीवर कार्यान्वित आहे. त्यामुळे शेकडो कुटुंबांच्या आरोग्याशी खेळ सुरू आहे. कुंभीवली ग्रामपंचायत हद्दीतील धामणी गावात नदीकिनारी तलावात मोठ्या प्रमाणात मांगूरचे दररोज किमान टनाचे उत्‍पादन केले जाते. हा माल पनवेल आणि मुंबईकडे रवाना केला जातो. त्‍यामुळे या उत्‍पादनावर कारवाई करावी, अशी मागणी स्‍थानिकांची आहे.

कारवाई थंडावली

मांगूरचे बेकायदा प्रजनन आणि उत्पादन करणाऱ्या व्यावसायिकांना विद्युतपुरवठा सहज उपलब्ध होत आहे, शिवाय वन विभागाच्या जागेतून रस्ता देण्यात आला आहे. गेल्या वर्षी रायगड मत्स्य विभाग यांनी पाटबंधारे विभाग, महावितरण, परिवहन विभाग, संबंधित ग्रामपंचायत, पोलिस विभाग, प्रदूषण नियामक मंडळाचे अधिकारी यांची बैठक अलिबाग येथे आयोजित केली होती. त्यानंतर महड हद्दीतील तलावांवर कारवाई करण्यात आली होती, मात्र नंतर पुढे कारवाई थंडावली.