Nashik News : नाशिक शहरातील अंबड एमआयडीसी येथील दातीर मळा परिसरात एका बंद गाळ्यामध्ये शेतकऱ्यांना विक्री हेतू साठवून ठेवलेला सुमारे ९.५० लाख रुपयांचा अवैध कीटकनाशक साठा कृषी विभागाच्या नाशिक जिल्हा भरारी पथकाने जप्त केला.

कृषी विभागाच्या नाशिक जिल्हा भरारी पथकाला मिळालेल्या माहितीच्या अनुषंगाने नाशिक विभागीय कृषी सहसंचालक सुभाष काटकर, जिल्हा अधीक्षक कृषी अधिकारी कैलास शिरसाठ, कृषी उपसंचालक जगदीश पाटील, जिल्हा परिषदेचे कृषी विकास अधिकारी संजय शेवाळे यांच्या मार्गदर्शनाखाली जिल्हा भरारी पथकाचे प्रमुख जिल्हा गुणवत्ता नियंत्रण निरीक्षक डॉ. जगन सूर्यवंशी,

विभागीय गुणवत्ता नियंत्रण निरीक्षक कल्याण पाटील, मोहीम अधिकारी दीपक सोमवंशी, तंत्र अधिकारी विजय चौधरी, पंचायत समितीचे कृषी अधिकारी राहुल अहिरे यांच्या भरारी पथकाने दातीर मळा एमआयडीसी अंबड येथील विनोद कुंभार यांच्या मालकीच्या बंद गाळ्यावर छापा मारून अवैध व विनापरवाना कीटकनाशकांचा साठा जप्त केला.

संशयित गाळामालक विनोद कुंभार व संशयित प्रशांत पवार यांच्या विरोधात अंबड पोलिस स्टेशन नाशिक येथे डॉ. जगन सूर्यवंशी यांनी गुन्हा दाखल केला आहे.