Buldana News : शेगाव तालुक्यातील केस गळती बाधित गावांत मंगळवारी (ता.१४) भारतीय वैद्यकीय संशोधन परिषद अर्थात दिल्ली आणि चेन्नई ‘आयसीएमआर’चे पथक दाखल झाले. या शास्त्रज्ञांच्या चमूमधील तज्ज्ञांनी जिल्ह्यातील वैद्यकीय आरोग्य अधिकाऱ्यांसोबत प्राथमिक चर्चा केली.

त्यानंतर या पथकामधील शास्त्रज्ञांनी केस गळती भागातील बाधित रुग्णांशी संवाद साधून केस गळतीचे मूळ कारण शोधून प्रादूर्भाव रोखण्याच्या दृष्टीने कामाला सुरुवात केली.

या विशेष पथकामध्ये डॉ. मनोज मुन्हेकर (नॅशनल इन्स्टिट्यूट ऑफ एपिडेमियोलॉजी चेन्नई), डॉ. सोमेश गुप्ता (एम्स, नवी दिल्ली), डॉ. सुमित अग्रवाल (आयसीएमआर, नवी दिल्ली), डॉ. शीला गोडबोले (आयसीएमआर, नॅशनल इन्स्टिट्यूट ऑफ ट्रान्सलेशनल व्हायरोलॉजी, पुणे), डॉ. राज तिवारी (संचालक नॅशनल इन्स्टिट्यूट ऑफ रिसर्च इन एन्व्हायर्नमेंटल हेल्थ, भोपाळ), डॉ. सुचित कांबळे (आयसीएमआर नॅशनल इन्स्टिट्यूट ऑफ ट्रान्सलेशनल व्हायरोलॉजी, पुणे) यांचा समावेश आहे.

आयुष मंत्रालयाअंतर्गत येणाऱ्या नवी दिल्ली येथील प्रादेशिक होमिओपॅथी संशोधन संस्था आणि केंद्रीय होमिओ परिषदेच्या शास्त्रज्ञांची चमूदेखील शेगाव तालुक्यात दाखल झालेली आहे.

यामध्ये युनानी होमीओपॅथी आणि आयुर्वेदिक तज्ञांचा समावेश असून डॉ. हिंकल कौर, डॉ. प्रियंका सूर्यवंशी, डॉ. तेजस्विनी पाटोळे यांच्या मार्गदर्शनाखाली केस गळती गावातील रुग्णांशी चर्चा करुन माहिती संकलित करण्याचे काम सुरु आहे. आयुर्वेद, होमीओपॅथी, युनानी आणि ॲलोपॅथीचे शास्त्रज्ञ केस गळती कारण शोधण्याचे काम करीत आहे.

केसगळती रुग्णांची संख्या पोचली १७८ वर

केस गळती रुग्णांच्या आकडेवारीनुसार शेगाव तालुक्यातील बोंडगाव येथे २३, कालवड २४, कठोरा २१, भोनगाव आठ, मच्छिंद्रखेड सहा, हिंगणा वैजिनाथ येथे पाच, घुई आठ, तरोडा कसबा १३, माटरगाव २१, पहुरजिरा ३२, निंबी १०, नांदुरा तालुक्यातील वाडी गावात सात असे एकूण १७८ रुग्ण आढळून आल्याची माहिती जिल्हा आरोग्य अधिकारी डॉ. अमोल गिते यांनी दिली.