Dharashiv News : जिल्ह्यात मागील काही दिवसापासून सुरु असलेल्या पावसामुळे खरीप हंगामाच्या मशागतीच्या कामे थांबली असतानाच पाऊस थांबता थांबत नसल्याची स्थिती आहे. गुरुवारी (ता. २९) रात्री पुन्हा पावसाने हजेरी लावली. यात उमरगा व लोहरा तालुक्यात मोठा पाऊस झाला. यात उमरगा तालुक्यातील दगडधानोरासह तलाव तुडूंब भरले.

शेतशिवारातील बांध व बंधारे फुटून शेतीचे मोठे नुकसान झाले आहे. पावसाने बेन्नीतुरा नदीला पूर आल्याने जिल्हा परिषद लघू पाटबंधारे विभागाकडून नदीत बांधण्यात आलेला सिमेंट बांधारा वाहून गेला आहे. मांजरा धरणाच्या पातळीत चार दिवसात पाणीसाठ्यात आठ दशलक्ष घनमीटरने वाढ झाली असून धरणात सध्या २६ दशलक्ष घनमीटर पाणीसाठा झाला आहे.

उमरगा तालुक्यात पंधरा दिवसापासून दिवसापासून कमी अधिक प्रमाणात पाऊस होत आहे. या दमदार पावसाने शिवारात सखल भागात पाणी साठले असून या पावसाने बेन्नीतुरा नदीसह परिसरातील नदी, नाले वाहते झाले आहेत. तालुक्यात गुरुवारी रात्री दहा ते बारा काळात मेघगर्जनेसह मुसळधार पाऊस झाला. हा पाऊस कमी अधिक प्रमाणात शुक्रवारी (ता.३०) पहाटे पर्यंत होता.

या मुसळधार पावसाने शिवारात ठीक ठिकाणी बांध बंधारे फुटून शेती क्षेत्राचे मोठ्या प्रमाणात नुकसान झाले आहे. नुकसानीचे प्रमाण पाहता आर्थिक फटक्याबरोबरच हे बांध बंधारे दुरुस्तीसाठी शेतकऱ्यांना अनेक दिवस लागतील. या पावसाने पुन्हा बेन्नीतुरा नदीसह परिसरातील नदी, नाले पात्र भरून वाहिली आहेत.

यावेळी बेन्नीतुरा नदीला आलेल्या पुरामुळे भूकंपापर्वीच्या जेवळीजवळ जिल्हा परिषद पाटबंधारे विभागाकडून २००५ मध्ये बांधण्यात आलेले सिमेंट बंधारा वाहून गेला आहे. दरम्यान बंधारा दुरुस्तीसाठी तातडीने उपाययोजना करण्यात येणार असल्याची माहिती लघु पाटबंधारे विभागाचे कनिष्ठ अभियंता ए. ए. गोरे यांनी दिली.