Kolhapur News: जिल्ह्यात काहीशी विश्रांती घेतलेल्या पावसाने सोमवारी (ता. १५) सायंकाळपासून पुन्हा दमदार सुरुवात केली आहे. सोमवारी सायंकाळी सुरू झालेला पाऊस मंगळवारी दुपारपर्यंत सुरूच होता. 

विशेषतः पश्चिम भागात रात्रभर पावसाच्या सरी झाल्याने या भागातील छोट्या नद्यांचे पाणी पात्राबाहेर आले. यामुळे अनेक गावांची वाहतूक बंद झाली. मंगळवारी दुपारपर्यंत विविध नद्यांवरील सुमारे तीस बंधारे पाण्याखाली होते.

पश्चिम भागात जोरदार पाऊस असल्याने आणखी बंधारे पाण्याखाली जाण्याची शक्यता आहे. मध्यंतरी पाऊस थांबल्याने शेतकऱ्यांनी मशागतीची कामे वेगात सुरू ठेवली होती. पण पुन्हा पाऊस सुरू झाल्याने या कामांना आता ब्रेक लागला आहे. सलग पाऊस सुरु झाल्याने शेतकऱ्यांना मशागतीचे काम थांबवावे लागले.