Nanded News : जिल्ह्यात शनिवारी झालेल्या मुसळधार पावसामुळे हदगाव, भोकर, किनवट, माहूर, व हिमायतनगर या तालुक्यासह तब्बल २६ महसूल मंडलांत अतिवृष्टीची नोंद झाली. जिल्ह्यात रविवारी (ता. १) सकाळी साडेआठला संपलेल्या २४ तासात सरासरी ५६.१० मिलिमीटर पाऊस झाला. हा पाऊस बारा मंडळात शंभर मिलिमीटर पेक्षा अधिक झाला. या पावसामुळे खरिपातील पिकांचे मोठ्या प्रमाणात नुकसान झाल्याची माहिती सूत्राने दिली.

मागील दोन दिवसापासून विश्रांती घेतलेल्या पावसाने शनिवारी सायंकाळी जोरदार हजेरी लावली. या पावसाचे प्रमाण मोठे असल्याने अनेक तालुक्यात याचा परिणाम दिसून आला. शनिवारचा पाऊस विदर्भ आणि तेलंगणाच्या सीमेवर असलेल्या तालुक्यात सर्वाधीक झाला.

या भागातील हदगाव, भोकर, किनवट, माहूर, व हिमायतनगर या तालुक्यासह तब्बल २६ महसूल मंडलांत अतिवृष्टीची नोंद झाली. या पावसामुळे खरिपातील कपाशी, सोयाबीन, तूर या पिकांसह हळद, केळी, भाजीपाला या पिकांचेही मोठ्या प्रमाणात नुकसान झाले आहे. दरम्यान जिल्हाधिकारी अभिजित राऊत यांनी अतिवृष्टीबाबत शासकीय यंत्रणेला सतर्क राहण्याचे आदेश दिले आहेत.

पावसाचे प्रमाण अधिक असलेल्या किनवट, माहूर, हदगाव, हिमायतनगर, भोकर तालुक्यातील अनेक ठिकाणी नदी-नाल्यांचे पाणी शेतात शिरल्याने पिकांचे मोठ्या प्रमाणात नुकसान झाले आहे. नुकसानीबाबत जिल्हा प्रशासन शासकीय यंत्रणेच्या संपर्कात आहे.

अतिवृष्टी झालेले मंडळ

हदगाव ७८.५०, तळणी ७८.७५, निवघा ६५, मनाठा ७२.५०, तामसा ८२.५०, पिंपरखेड ७३.७५, आष्टी ११२.७५, किनी ९५.५०, किनवट १४०, बोधडी ८१.२५, इस्लापूर १६५, जलधारा १३८, शिवणी १०२, मांडवा १५३.२५, दहेली ११२.२५, सिंदगी १७८.७५, उमरी बाजार १६०.२५, मुदखेड ६६.५०, हिमायतनगर ८०.५०, जवळगाव ११८.२५, सरसम १११.५०, माहूर ११७.५५, वानोळा ७६.२५. वाई ८८.७५, सिंदखेड ९१.५०, अर्धापूर ७२.७५.

तालुकानिहाय झालेला पाऊस (मिलिमीटरमध्ये)

नांदेड ४४.७०, बिलोली ३६.४०, मुखेड २४.२०, कंधार २०.९०, लोहा ३१.८०, हदगाव ८०.६०, भोकर ६६.५०, देगलूर २९.९०, किनवट १३६.८०, मुदखेड ५७.५०, हिमायतनगर १०३.४०, माहूर ९३.६०, धर्माबाद ३३.७०, उमरी ४९.७०, अर्धापूर ५०.७०, नायगाव ४५.