Kolhapur Weather Forecast : कोल्हापूर जिल्ह्यातील शिरोळ तालुक्यात जोरदार पावसाने हजेरी लावली. यामध्ये दानोळी, कोथळी, अब्दुललाट तसेच शिरोळ तालुक्यातील अनेक भागात पाऊस पडला. यामध्ये दानोळी परिसरात सायंकाळी अचानक वाऱ्यासह पावसामुळे नुकसान झाले. आठवडी बाजारातील विक्रेता व नागरिकांची पावसाने तारांबळ उडाली.

जोरदार झालेल्या पावसाने शेतात पाणी साचून राहिल्याने ऊस तोडी व वाहतूक ठप्प झाल्या. भाजीपाला पिकाचे नुकसान झाले. सायंकाळी अचानक वारा सुरू झाला. त्यानंतर लगेच जोरदार पाऊस सुरू झाला. ऊस तोड, उसाने भरलेली वाहने बाहेर काढण्यासाठी अडचण निर्माण झाली होती. दरम्यान, कोल्हापुरातील कसबा बावड्यात काही ठिकाणी तुरळक पाऊस झाला.

कोल्हापुरात आणखी पावसाची शक्यता

बंगालच्या उपसागरातील ‘फेइंजल’ चक्रीवादळ प्रणालीमुळे राज्यात पावसाला पोषक हवामान तयार झाले आहे. अनेक ठिकाणी किमान तापमान १७ अंशांच्या पुढे गेल्याने थंडी गायब झाली आहे. राज्यात तापमानातील वाढ कायम राहून, सिंधुदुर्ग आणि कोल्हापूर जिल्ह्यांत विजांसह वादळी पावसाचा इशारा हवामान विभागाने दिला आहे.

कोल्हापूरमध्ये आज संमिश्र वातावरण राहील. घाटमाथ्यासह काही ठिकाणी विजांसह पावसाच्या हलक्या सरी पडण्याची शक्यता आहे. कमाल तापमान 31 अंश सेल्सिअस तर किमान तापमान 21 अंश सेल्सिअस असेल.