Satara News : गेल्या चार- पाच दिवसांपासून सुरू असलेल्या परतीच्या पावसाने परिसरातील स्ट्रॉबेरी रोपवाटिकांचे अतोनात नुकसान झाले आहे. त्यातच भर म्हणून रोपांचे दरही पडल्याने शेतकऱ्यांना आर्थिक नुकसान सोसावे लागत आहे.

स्ट्रॉबेरी हे पीक महाबळेश्वरची ओळख असली, तरी रोपांच्या निर्मितीसाठी वाई, जावळी व कोरेगाव तालुक्यांवर अवलंबून राहावे लागते. यंदाही महाबळेश्वर तालुक्यातील, तसेच अनेक स्थानिक शेतकऱ्यांनी स्ट्रॉबेरीच्या मातृवृक्षापासून रोपे तयार केली होती.

मे व जून अशा दोन टप्प्यांत ही निर्मिती झाली. मात्र, यंदा सततच्या पावसाने, तसेच रोग किडींच्या प्रादुर्भावाने रोपे तयार करण्यात प्रचंड अडचणी आल्या. त्यातच मजुरांचीही मोठी टंचाई निर्माण झाल्याने अनेक शेतकऱ्यांकडून इतर तालुक्यातून मजूर आणण्याची वेळ आली.

स्ट्रॉबेरी रोपांना यावर्षीदेखील चांगला दर राहील, या आशेवर अनेक शेतकऱ्यांकडून मजुरांवर खर्च करण्यात आला. मध्यंतरी काही काळ पावसाने विश्रांती दिल्याने पहिल्या टप्प्यातील अनेकांची रोपे नऊ ते दहा रुपयांपर्यंत विकली गेली.

मात्र, आज पंधरा दिवसांतच रोपांचे दर निम्म्याहून खाली आले आहेत. त्यातच भर म्हणून सतत पडत असलेल्या संततधार पावसाने रोपांच्या लागणीही रखडल्या आहेत, तर ज्या शेतकऱ्यांनी लागवडी केल्या, त्यांना मररोगाचा सामना करावा लागत आहे.