Nanded News : नांदेड जिल्ह्यात मॉन्सूनपूर्व पावसाने धुमाकूळ घातला आहे. जिल्ह्याच्या अनेक भागांत मागील चार दिवसांपासून पाऊस सुरू आहे. शुक्रवारी (ता. २३) जिल्ह्यात किनवट वगळता इतर १५ तालुक्यांत जोरदार पाऊस झाला. या पावसामुळे खरीपपूर्व पेरण्यांची कामे खोळंबली आहेत.

प्रादेशिक हवामानशास्त्र केंद्र मुंबई यांनी शुक्रवारी (ता. २३) दिलेल्या सूचनेनुसार नांदेड जिल्ह्यासाठी ता. २४ मे रोजी ऑरेंज अलर्ट व २३, २५ व २७ मे हे तीन दिवस येलो अलर्ट जारी केला आहे.

ता. २३, २५, व २७ मे या तीन दिवसांतील व २५ व २७ मे रोजी जिल्ह्यात तुरळक ठिकाणी ताशी ४० ते ५० किमी वेगाने वादळी वारे वाहण्याची, विजेच्या कडकडाटासह व ढगांच्या गडगडाटासह हलका ते मध्यम स्वरूपाचा पाऊस पडण्याची अधिक शक्यता वर्तविली आहे. २६ मे रोजी जिल्ह्यात तुरळक ठिकाणी विजेच्या कडकडाटासह व ढगांच्या गडगडाटासह हलका ते मध्यम स्वरूपाचा पाऊस पडण्याची अधिक शक्यता वर्तविली आहे.

जिल्ह्यात मागील चार दिवसांपासून पावसाने रिपरिप लावली आहे. हा पाऊस जिल्ह्याच्या सर्वच भागात होत आहे. या पावसामुळे पेरणीपूर्व कामांना ब्रेक लागला आहे. शेतकऱ्यांना पाऊस थांबण्याची प्रतीक्षा आहे. दरम्यान मॉन्सूनपूर्व पावसामुळे शेतातील नाले वाहून त्यात गाळ साचली आहे. शनिवारी (ता. २४) पावसाचा जोर अधिक असल्याने सूर्यदर्शन झाले नाही.\

शुक्रवारी झालेला तालुकानिहाय पाऊस (मिलिमीटरमध्ये)

नांदेड २४.२, बिलोली ३४.३, मुखेड २६.२, कंधार २२.०, लोहा १८.३, हदगाव १५.२, भोकर ४.५, देगलूर २८.८, किनवट शून्य, मुदखेड ११.०, हिमायतनगर २५.५, माहूर २६.९, धर्माबाद १६.९, उमरी १२.६, अर्धापूर १०.३, नायगाव १४.६. एकूण २०.८ मिलिमीटर पावसाची नोंद झाली.