Pune News : महाशिवरात्रीनिमित्त १२ ज्योतिर्लिंगांपैकी एक असणारे श्री क्षेत्र भीमाशंकर येथे सोहळा साजरा होत आहे. त्यानिमित्त येथील महादेव मंदिरावर विद्युत रोषणाई करण्यात आली आहे. भाविकांच्या स्वागतासाठी मंदिर सज्ज झाले आहे.

महाशिवरात्रीच्या पहाटे पवित्र शिवलिंगाचे दर्शन महत्त्वाचे मानले जात असल्याने भाविक दोन दिवस आधीच भीमाशंकर येथे मुक्कामी येतात. त्यामुळे भक्तनिवास आणि इतर काही ठिकाणी भाविकांची राहण्याची व्यवस्था आहे. मंदिर आणि परिसरात बॅरिकेडिंग, सजावट, रंगरंगोटी, स्वच्छता अशी कामे करण्यात आली आहेत.

वाहनतळ ते भीमाशंकर बस स्थानकापर्यंत ३५ मिनी आणि मोठ्या एसटी बसची व्यवस्था करण्यात आली आहे. शिवलिंगाच्या दर्शनासाठी बारीसह मुख दर्शन व पासची सुविधा आहे. घोडेगाव, खेड पोलिस ठाण्याअंतर्गत उपविभागीय पोलिस अधिकारी, पाच पोलिस निरीक्षक, २० सहायक पोलिस निरीक्षक व पोलिस उपनिरीक्षक अधिकारी तसेच २६० पोलिस कर्मचारी, ४० होमगार्ड असा बंदोबस्त ठेवण्यात आला आहे. तसेच श्‍वान पथकही नेमण्यात आल्याचे उपविभागीय पोलिस अधिकारी सुदर्शन पाटील यांनी सांगितले.

हा सोहळा शांततेत पार पाडण्यासाठी सर्वांनी सहकार्य करावे, असे आवाहन प्रांत अधिकारी गोविंद शिंदे यांनी केले आहे. यात्रेसाठी देवस्थानच्या वतीने भाविकांना आवश्यक त्या सुविधा पुरविण्यात येणार असल्याचे भीमाशंकर देवस्थानचे अध्यक्ष अॅड. सुरेश कौदरे यांनी सांगितले.