Yavatmal News : पेसा क्षेत्रातील जागांचा वाद न्यायालयात पोहोचल्याने जिल्हा परिषदेतील ग्रामसेवक, आरोग्य सेवक पुरुष आणि महिला, पर्यवेक्षक आदींच्या भरतीला ब्रेक लागला होता. शेवटी सर्वसाधारण क्षेत्रातील पदभरती घेण्याबाबत न्यायालयाने शासनाला निर्देश दिले होते.

त्यानुसार आयबीपीएस कंपनीला परीक्षेचे वेळापत्रक निश्‍चित करावे, असे आदेश दिले होते. १८ ते २४ जुलै ह्या कालावधीत ऑनलाइन परीक्षा घेतली जाणार आहे. परंतु, पेसा क्षेत्रातील पदभरतीचा निर्णय अद्यापही घेण्यात आलेला नाही.

बहुप्रतीक्षेनंतर जिल्हा परिषदेतील विविध संवर्गातील ८७५ पदांच्या भरतीला ऑक्टोबर २०२३ पासून सुरवात झाली. या परीक्षेची जबाबदारी आयबीपीएस कंपनीवर सोपविण्यात आली होती. त्यानंतर टप्प्या टप्प्यात विविध संवर्गातील पदांसाठी ऑनलाइन परीक्षा पार पडली. मात्र, मध्यंतरी पेसा क्षेत्रातील जागेचा वाद न्यायालयात पोहोचला होता. त्यामुळे न्यायालयाने अंतिम सुनावणी होईपर्यंत पेसा क्षेत्रातील जागा असलेल्या पदांची भरती घेऊ नये, असे आदेश दिले होते.

शेवटी न्यायालयाने सर्वसाधारण क्षेत्रातील पदांची परीक्षा घ्यावी, असे आदेश शासनाला दिले होते. त्या आदेशावरून शासनाने ग्रामसेवक, आरोग्य सेवक पुरुष, महिला, पर्यवेक्षक, एमपीडब्ल्यू आदी पदांच्या भरतीचे वेळापत्रक जाहीर करावे, असे निर्देश आयबीपीएस कंपनीला दिले होते.

त्या आदेशावरून कंपनीने १८ ते २४ जुलै या कालावधीत परीक्षा घेण्याची तयारी दर्शविली होती. आता गुरुवार, (ता. १८) जुलै रोजी पर्यवेक्षक, शुक्रवार, (ता. १९) जुलै परिचारिका, आरोग्य सेवक महिला, २२ आणि २३ जुलै रोजी आरोग्य सेवक पुरुष (४० टक्के), तसेच २३ ते २४ जुलै रोजी आरोग्य सेवक पुरुष ५० टक्के (हंगामी फवारणी क्षेत्र कर्मचारी) आदी पदांची परीक्षा ऑनलाइन होणार आहे.

ग्रामसेवकांच्या १६१, तर आरोग्याच्या ४७४ जागा

पेसा आणि सर्वसाधारण क्षेत्रातील मिळून ग्रामसेवकांच्या १६१ जागेसाठी ३२ हजार ३०६, तर आरोग्य विभागातील आरोग्य सेवक पुरुष, महिला, पर्यवेक्षक, हंगामी फवारणी क्षेत्र कर्मचारी या जागेकरिता २२ हजार ४१, असे मिळून ५४ हजार ३४७ उमेदवारांनी अर्ज दाखल केले आहे.