Nashik News : द्राक्षासह इतर शेतीमाल विक्रीतून वेळोवेळी होणारी फसवणूक टाळण्यासाठी पणनमंत्री यांच्याशी चर्चा करून सवर्कष स्वरूपाचा कायदा करण्यासाठी प्रयत्न करण्यात येतील, असे प्रतिपादन कृषिमंत्री ॲड. माणिकराव कोकाटे यांनी केले.

नाशिक विभाग पोलिस महानिरीक्षक कार्यालयात बुधवारी (ता. २५) दुपारी महाराष्ट्र द्राक्ष बागायतदार संघाच्या माध्यमातून आयोजित फसवणूक झालेल्या द्राक्ष उत्पादक शेतकऱ्यांच्या समस्यांबाबत बैठक आयोजित करण्यात आली होती. त्यावेळी ते बोलत होते. या प्रसंगी विशेष पोलिस महानिरीक्षक दत्तात्रय कराळे, पोलिस अधीक्षक विक्रम देशमाने, अतिरिक्त पोलिस अधीक्षक आदित्य मिरखेलकर, द्राक्ष बागायतदार संघाचे अध्यक्ष कैलास भोसले, सह्याद्री फार्मचे अध्यक्ष विलास शिंदे आदी उपस्थित होते.

विशेष पोलिस महानिरीक्षक कराळे म्हणाले, की शेतकऱ्यांनी फसवणूकप्रकरणी पोलिस अधीक्षक यांची भेट घ्यावी. शेतीमाल देताना व्यापाऱ्यांकडून सौदा पावती करून घ्यावी. जेणेकरून फसवणूक झाली, तर कायदेशीर करवाई करता येईल. कृषी विभाग, बागायतदार, पोलिसांतर्फे जागृती करण्यात येईल.

पोलिस अधीक्षक देशमाने यांनी सांगितले, की या बाबत तीन महिन्यांपासून कार्यवाही सुरू आहे. त्यासाठी वरिष्ठ अधिकाऱ्यांचे एक पथक स्थापन केले आहे. फसवणूक प्रकरणी गुन्हे दाखल केले असून आरोपी अटकेत आहे. पोलिस यंत्रणेच्या माध्यमातून व्यापाऱ्यांची पडताळणी करून देईल. त्यासाठी शेतकऱ्यांनी माहिती पुरवावी. या बाबत लवकरच बैठक घेण्यात येईल, असेही त्यांनी सांगितले.

द्राक्ष बागायतदार संघाचे अध्यक्ष भोसले, शिंदे यांच्यासह शेतकऱ्यांनी समस्या मांडल्या. त्यांनी शेतकऱ्यांची फसवणूक टाळण्यासाठी प्रतिबंधक उपाययोजना व्हाव्यात, अशी अपेक्षा व्यक्त केली. या वेळी विभागीय अध्यक्ष बाळासाहेब गडाख, सचिव बबनराव भालेराव, रवींद्र निमसे, बाळासाहेब वाघ यांच्यासह फसवणूक झालेले शेतकरी उपस्थित होते.

...तर व्यापाऱ्यांच्या मालमत्ता सील

फसवणूक करणाऱ्या संशयित आरोपींची पोलिसांनी सखोल चौकशी करावी. या बाबत जनजागृतीसाठी कृषी विभागातर्फे मोहीम राबविण्यात येईल. शेतकऱ्यांची फसवणुकीपोटी झालेल्या ४६ कोटी रुपयांच्या वसुलीसाठी सहकार्य करण्यात येईल. अशा व्यापाऱ्यांच्या मालमत्ता सील कराव्यात, असेही मंत्री कोकाटे यांनी नमूद केले.