Solapur News : कृषी क्षेत्रात नवनवीन तंत्रज्ञान येत असून, शेतकऱ्यांनी हे तंत्रज्ञान आत्मसात करणे आवश्यक आहे. त्याप्रमाणे शेतकऱ्यांनी पारंपरिक पिकांऐवजी कमी संसाधनात जास्तीत जास्त उत्पादन देणाऱ्या नवीन पिकांचे प्रयोग शेतात राबवले गेले पाहिजेत. तुती लागवड किंवा रेशीम उत्पादन हा एक चांगला पर्याय शेतकऱ्यांसमोर आलेला असून, रेशीम शेतीकडे राज्यातील शेतकरी मोठ्या प्रमाणावर आकर्षित होत आहेत. राज्य शासन ही रेशीम उद्योगास चालना देण्यासाठी कटिबद्ध असल्याचे प्रतिपादन पालकमंत्री चंद्रकांत पाटील यांनी बुधवारी (ता. १९) केले.

हिरज (ता. उत्तर सोलापूर) रेशीम कोष बाजारपेठ आणि रेशीम पार्क इमारतीचे उद्‌घाटन पालकमंत्री पाटील यांच्या हस्ते झाले. या वेळी आयोजित रेशीम शेतकरी कार्यशाळेमध्ये ते बोलत होते. या वेळी जिल्हाधिकारी कुमार आशीर्वाद, आमदार सुभाष देशमुख, उपसचिव श्रद्धा कोचरेकर, कुलगुरू प्रकाश महानवर, प्रादेशिक सहायक संचालक कविता देशपांडे, ‘आत्मा’चे प्रकल्प संचालक शीतल चव्हाण,

रेशीम विभागाचे उपसंचालक महेंद्र ढवळे, जिल्हा कृषी अधीक्षक कृषी अधिकारी दत्तात्रय गावसाने, रेशीम विकास अधिकारी विनीत पवार, एम. ए. कट्टे, राम जाधव उपस्थित होते. आमदार सुभाष देशमुख यांनी या वेळी रेशीम बाजारपेठ कार्यान्वित केली असून, आता उत्पादन वाढीकडे लक्ष देण्याची अपेक्षा व्यक्त केली. उपसंचालक श्री. ढवळे यांनीही मनोगत व्यक्त केले. या वेळी रेशीम उद्योग पुस्तिकेचे प्रकाशन पालकमंत्री पाटील यांच्या हस्ते झाले. रेशीम विकास अधिकारी विनीत पवार यांनी प्रास्ताविक केले.

वार्षिक योजनेतून रेशीम शेतीला साह्य

जिल्हाधिकारी कुमार आशीर्वाद म्हणाले, की जिल्ह्यातील वातावरण डाळिंब व रेशीम उत्पादनासाठी फायदेशीर आहे. शेतकऱ्यांच्या बांधावर जाऊन त्यांच्या अडचणी व समस्या जाणून घेतल्या आहेत. रेशीम अनुदानाचे प्रलंबित प्रस्ताव लवकर मार्गी लागण्यासाठी प्रयत्न करत आहोत. जिल्हा वार्षिक योजनेच्या माध्यमातून रेशीम उद्योगास चालना मिळण्यासाठी मदत करणार असल्याचे त्यांनी या वेळी सांगितले.