Nagpur News : कृषी विभागाच्या खांद्याला खांदा लावत संशोधन संस्थांद्वारे विकसित तंत्रज्ञान शेतकऱ्यांपर्यंत पोहोचविण्यात घातखेड कृषी विज्ञान केंद्र मोलाची भूमिका बजावत आहे. त्याच्याच परिणामी जिल्ह्यात व्यावसायिक पिकांखालील क्षेत्र विस्तारत वेळ आणि श्रमात बचतीसाठी विविध संयंत्राचा वापरही वाढला आहे, असे प्रतिपादन जिल्हा अधीक्षक कृषी अधिकारी राहुल सातपुते यांनी केले.

घातखेड केव्हीकेच्या वतीने आयोजित सुवर्ण जयंती कार्यक्रमात ते बोलत होते. अध्यक्षस्थानी श्रमसाफल्य फाऊंडेशनचे विश्‍वस्त प्रल्हाद ठाकरे, महिला आर्थिक विकास महामंडळाचे जिल्हा समन्वय अधिकारी सुनील सोसे, आत्मा प्रकल्प संचालक अर्चना निस्ताने, वरिष्ठ शास्त्रज्ञ तसेच केव्हीके प्रमुख डॉ. अतुल कळसकर, अंकुर सिड्स कंपनीचे महाव्यवस्थापक अमोल शिरसाट, डॉ. वडाळकर यांची या वेळी उपस्थिती होती.

अर्चना निस्ताने यांनी देखील या वेळी विचार व्यक्‍त केले. केव्हीके, कृषी विभाग तसेच आत्मा या तीनही यंत्रणाचा अंतिम उद्देश कृषी विद्यापीठासोबतच इतर संशोधन संस्थांनी विकसित केलेले तंत्रज्ञान शेतकऱ्यांपर्यंत पोहोचविणे हा आहे.

घातखेड केव्हीकेच्या वतीने दुर्गम मेळघाटातील आदिवासींपर्यंत पीक प्रात्यक्षिकाच्या माध्यमातून तंत्रज्ञान विस्तारासाठी पुढाकार घेण्यात आला आहे, ही बाब निश्चितच कौतुकास्पद आहे, असे त्या म्हणाल्या.

केंद्रीय कापूस संशोधन संस्थेच्या सघन कापूस लागवड प्रकल्पाची अंमलबजावणी केव्हीकेच्या माध्यमातून होत आहे. त्यासोबत यांत्रिकीकरणालाही प्रोत्साहन दिले जात असल्याची बाब दिलासादायक असल्याचे त्यांनी सांगितले. डॉ. अतुल कळसकर यांनी प्रास्ताविकातून केव्हीकेच्या आजवरच्या वाटलाची माहिती दिली.