Pune News: जमीन मोजणीसंदर्भातील तालुका उपअधीक्षक, जिल्हा अधीक्षक, प्रदेश उपसंचालक ते महसूलमंत्री यांच्या न्यायालयात दाखल असलेल्या दाव्यांची पुढील तारीख, दाव्यांची सद्यःस्थिती यांच्यासह निकालाची प्रत ऑनलाइन उपलब्ध होणार आहे.

त्यासाठी भूमिअभिलेख विभागाने एनआयसीच्या मदतीने www.eqjcourts.gov.in हे संकेतस्थळ विकसित करण्याचे काम हाती घेतले आहे. या संकेतस्थळावर घरबसल्या दाव्यांची सर्व माहिती मिळणार आहे, अशी माहिती राज्याचे जमाबंदी आयुक्त डॉ. सुहास दिवसे यांनी दिली.

राज्य सरकारकडून सर्व खात्यांना शंभर दिवसांचा कार्यक्रम निश्‍चित करून देण्यात आला आहे. त्यामध्ये भूमिअभिलेख विभागाकडून सर्वसामान्य नागरिकांसाठी ईक्यूजे कोर्ट ही सुविधा उपलब्ध करून देण्यात येणार आहे. त्यासाठी तयार करण्यात आलेल्या संकेतस्थळाची नुकतीच सहाही विभागांत प्राथमिक स्तरावर चाचपणी करण्यात आली. लवकरच राज्यभरात ही प्रणाली लागू करण्यात येणार आहे.

जमिनींच्या हद्दीवरून निर्माण होणारे वाद, मोजणीतील त्रुटी अशा अनेक प्रकरणांसाठी भूमिअभिलेख विभागातील उपअधीक्षक, जिल्हा अधीक्षक, उपसंचालक आणि महसूलमंत्री यांच्यापर्यंत अपिलामार्फत दाद मागता येते. मात्र, अपील दाखल केल्यानंतर सध्या भूमिअभिलेख विभागात पारंपरिक पद्धतीने त्यावर कारवाई केली जाते.

त्यासाठी अपीलकर्त्याला तारखांना हजर राहावे लागते. तर निकालानंतर तो ऑनलाइन प्रसिद्ध करण्यात येते. मात्र, आता ईक्यूजे कोर्ट प्रणालीमध्ये ऑनलाइन दावा दाखल करण्याबरोबरच त्या दाव्याची सद्यःस्थिती जाणून घेण्याची सुविधा उपलब्ध करून देण्यात येणार आहेत.

निकालाची प्रतही संकेतस्थळावर

जमीन मोजणीविषयक दाव्यांच्या माहितीसाठी हे संकेतस्थळ विकसित करण्यात येत आहे. दावा दाखल केल्यानंतर संबंधित कारकून याची नोंद ई डिसनिक या प्रणालीमध्ये करणार आहे. यामध्ये दाव्याचा तपशील, पक्षकारांचा मोबाइल नंबर आदी माहिती भरली जाणार आहे.

त्यानंतर पक्षकारांना पुढील तारीख कधी, याची माहिती देणारा एसएमएस येईल. याशिवाय दाव्याचा निकाल लागल्यानंतर निकालाची प्रतही या संकेतस्थळावर अपलोड करण्यात येणार आहे. त्यामुळे निकालाची प्रतही घरबसल्या बघता येणार आहे.