Pune News : थंडीत चढ-उतार होत असताना जिल्ह्यात मागील दोन ते तीन दिवसांपासून ढगाळ वातावरण तयार झाले आहे. अनेक ठिकाणी हलका पाऊस पडला. त्यानंतर गुरुवारी (ता. ११) सकाळी ठिकठिकाणी धुक्याची चादर पसरली. काहीशी वाढलेली थंडी गहू, हरभरा पिकांसाठी पोषक असली तरी काही प्रमाणात रोग, किडीचा प्रादुर्भाव वाढण्याची शक्यता आहे.

गेल्या काही दिवसांपासून जिल्ह्यातील वातावरणात सतत बदल होत आहे. विविध भागांत पाऊस पडत आहे. कधी पाऊस, ढगाळ हवामान तर कधी थंडी असे संमिश्र वातावरण आहे. गुरुवारी दाट धुके पडले होते.

त्यामुळे पिकांवर दव तयार झाले. धुक्याचा परिणाम पीक वाढीवरही होणार आहे. परिणामी, शेतकऱ्यांना फवारणीचा खर्च करावा लागणार आहे. धुक्याचा फटका रब्बी पिकांसह कांदा पिकालाही बसेल.

पिके वाचविण्यासाठी शेतकऱ्यांना फवारणी करावी लागेल. फवारणीच्या अतिरिक्त खर्चामुळे भांडवली खर्चात वाढ होणार आहे. त्यामुळे शेतकऱ्यांनी चिंता व्यक्त केली आहे.

लहरी वातावरणाचा फटका

बदलत्या वातावरणामुळे पिकांवर रोगांचा प्रादुर्भाव वाढला आहे. पिकांवर महागडी औषधे फवारणी करावी लागत आहेत.

त्यामुळे भांडवली खर्चात वाढ होत आहे. टोमॅटो, वांगी, कोबी, फ्लॉवर, कांदापात, कोथिंबीर, मेथी, गवार या पिकांवर करपा, बोकड्या, आकसा, भुरी, मावा, तुडतुडे आदी रोग वाढले आहेत.