Solapur News : सोलापूर जिल्ह्यात वाढत्या उन्हाबरोबर टंचाईच्या झळा वाढत आहेत. त्यात आता चाराटंचाईची भर पडली आहे. परंतु जिल्हा परिषदेच्या पशुसंवर्धन विभागाच्या आकडेवारीनुसार जिल्ह्यात २१ लाख ७८ हजार ५५ मेट्रिक टन एवढा चारा शिल्लक आहे.

साधारण पुढील १०९ दिवस पुरेल एवढा हा चारा आहे, पण चारा पुरेसा असूनही दर आवाक्याबाहेर गेले आहेत. दुसरीकडे जनावर बाजारात एक ते दीड लाखावरील गाईच्या किमती आता जवळपास निम्म्यावर आल्या आहेत.

जिल्ह्यात प्रामुख्याने मंगळवेढा, सांगोला, पंढऱपूर, माळशिरस, बार्शी, माढा, उत्तर सोलापूर, दक्षिण सोलापूर आणि अक्कलकोट भागात सध्या पाणीटंचाईची झळ वाढली आहे. त्याचबरोबर आता चाऱ्याचीही वाणवा जाणवू लागली आहे. जिल्ह्यातील सांगोला, पंढरपूर, माळशिरस, माढा या भागांत ओला आणि कोरडा अशा दोन्ही पद्धतींच्या चाऱ्याची मोठी मागणी आहे.

जून-जुलैनंतर पाऊस लांबल्यास चाराटंचाईचे मोठे संकट ओढावणार आहे. कडब्यापेक्षाही कडवळ, मका या ओल्या चारा पिकांची स्थिती सध्या पाण्याअभावी वाईट आहे. पुरेशाप्रमाणात त्याची वाढ होऊ शकलेली नाही. त्यामुळे हिरव्या चाऱ्याची कमतरता भासत आहे.

कडब्याचा दर प्रतिहजार पेंढ्यांना १० ते १५ हजार रुपयांपर्यंत आहे. तर हिरव्या चाऱ्यात कडवळ, मका यांना एकरी ३५ ते ४० हजार रुपयांपर्यंतचा दर आहे. जेमतेम चाऱ्यावर आणि पशुखाद्यावरच कशी-बशी जनावरे जगवली जात आहेत. त्याचा परिणाम आता दुग्धोत्पादनावर होत आहे. पण दुधालाही दर नाही. त्यामुळे एकीकडे पाण्याची झळ, दुसरीकडे चाऱ्याची वाणवा अशा दुहेरी कोंडीत शेतकरी सापडले आहेत.