Pune News: केंद्र शासनाच्या १० हजार एफपीओ स्थापना व प्रोसाहन योजनेअंतर्गत ‘नाफेड’ आणि सीबीबीओ सिमासेस लर्निंग (एसआयआयएलसी) यांच्या मार्गदर्शनाखाली स्थापन झालेल्या सिल्कबेरी फेड शेतकरी उत्पादक कंपनीच्या शेतकरी आठवडी बाजाराचे उद्‌घाटन २१ मे रोजी झाले.

गांधी भवनचे अध्यक्ष डॉ. कुमार सप्तर्षी आणि पुणे महानगरपालिकेचे उपायुक्त डॉ. रमेश शेलार यांच्या हस्ते फित कापून या आठवडी बाजाराचे उद्‌घाटन झाले. संत शिरोमणी सावतामाळी महाराज आठवडे बाजार अभियानांतर्गत कोथरूड-पुणे येथील गांधी भवनच्या मैदानावर हा आठवडी बाजार दर बुधवारी भरणार आहे.

शेतकरी गटांनी उत्पादित केलेला ताजा भाजीपाला थेट शहरातील ग्राहकापर्यंत रास्त दरामध्ये उपलब्ध करणे हा शेतकरी आठवडी बाजार सुरू करण्याचा हा मुख्य उद्देश असल्याचे सिल्कबेरी फेड फार्मर कंपनीचे संचालक विजय गारगोटे यांनी सांगितले.

परिसरातील नागरिकांनी या सेवेचा लाभ घेत थेट शेतकऱ्यांकडून उपलब्ध झालेला शेतीमाल खरेदी करण्याचे आवाहन कंपनीकडून करण्यात आले. पुणे शहरात विविध ठिकाणी वेगवेगळ्या दिवशी आठवडी बाजार उपक्रम चालणार आहे.

उद्‌घाटनप्रसंगी पोलिस निरीक्षक संतोष पाटील, सिमासेस लर्निंगचे प्रकल्प व्यवस्थापक जयप्रकाश कुलकर्णी, धवलक्रांती फाउंडेशनचे डॉ. किशोर उढाण, श्रीकृष्ण गोशाळाचे रामदास घुले, आयडियल मीडियाचे आदेश टोपे, दत्तात्रय पोटवडे, सिल्कबेरीचे विठ्ठल सुकाळे, स्वप्नील टोपे, रामदास ढेरंगे, आनंद शिनगारे, सुनील टोपे व शेतकरी बांधव उपस्थित होते.

सिल्कबेरी आठवडी बाजाराचे वेळापत्रक

- बुधवार- गांधी मैदान, कोथरूड

- गुरुवार- बकाजी कॉर्नर बावधन

- शुक्रवार- मोशी

- शनिवार-रावेत