Pune News : पहिली उचल प्रतिटन ३३०० रुपये मिळावी आणि गेटकेन उसाचे गाळप पूर्ण बंद करावे, या मागण्यांसाठी शेतकरी कृती समितीने शनिवारी (ता. २८) सोमेश्वर कारखान्यावर मोर्चा काढला. याप्रसंगी झालेल्या चर्चेनंतर विविध मागण्यांवर निर्णय घेण्यासाठी ५ जानेवारीपर्यंतची मुदत संचालक मंडळास देण्यात आली. अन्यथा ९ जानेवारीला ‘काटा बंद’ आंदोलन करणार असल्याचा निर्णायक इशारा कृती समितीने दिला आहे.

शेतकरी कृती समितीचे नेते सतीश काकडे यांच्या नेतृत्वाखाली ऊस उत्पादक सभासदांनी शनिवारी मोर्चा काढून कार्यकारी संचालक राजेंद्र यादव यांना निवेदन दिले. याप्रसंगी शहाजी जगताप, धन्यकुमार जगताप, अंकुश जगताप, एकनाथ होळकर, संपतराव भेलके, संजय घाडगे, लक्ष्मण गावडे, राहुल जगताप, राजकुमार बनसोडे, प्रकाश जगताप, संपतराव लकडे, शिवाजी गडदरे, हेमंत काकडे, अॅड. अनंत सकुंडे, अविनाश जगताप, संभाजी काकडे, दत्तात्रेय भोईटे, बंटीराजे जगताप, अमरसिंग चव्हाण उपस्थित होते.

या मोर्चास उपाध्यक्ष बाळासाहेब कामथे, जेष्ठ संचालक लक्ष्मण गोफणे, कार्यकारी संचालक राजेंद्र यादव सामोरे गेले. याप्रसंगी सतीश काकडे यांनी, चव्वेचाळीस दिवसात उचल का दिली नाही? सभासदांची उसतोड लांबत असतानाही गेटकेन बंद का केला नाही? निवेदनांवर उत्तरे का दिली जात नाहीत? असे जाब विचारत संचालक व कार्यकारी संचालकांना धारेवर धरले

कृती समितीच्या मागण्या

३३०० रुपये पहिली उचल

गेटकेनेचे गाळप पूर्ण बंद करावे

सभासदांच्या ऊसतोडीला प्राधान्य द्यावे

कर्जमाफीच्या लाभाकरीता सोसायटीच्या कर्जांपोटी कपात करू नये

मजुरांनी ऊस जळीत केल्यास कपात करू नये

मुद्दाम ऊस जाळणाऱ्या शेतकऱ्यांना दंड करावा