Sangli News : जिल्ह्यात खरीप हंगाम पावसावर पिके तगली, गत महिन्यात १३ दिवस पावसाचा खंड पडला. त्यामुळे मान टाकलेली पिके पाणी देऊन जगवली. मुळात, अति पाऊस आणि काही प्रमाणात पावसाचा खंड या दोन्हीचा फटका खरिपातील पिकांना बसला आहे.

त्याच बदलत्या वातावरणामुळे कीड-रोगांचा प्रादुर्भावही होऊ लागला आहे. या साऱ्यामुळे उत्पादनात घट होईल, असा अंदाजही व्यक्त होऊ लागला आहे. मात्र गेल्या दोन दिवसांत झालेल्या पावसाने शेतकऱ्यांना दिलासा मिळाला आहे.

जिल्ह्यात खरिपाचा पेरा २ लाख २७ हजार ३८६ हेक्टर म्हणजे ९२ टक्के झाला आहे. मुळात सततच्या पावसामुळे पेरण्या रखडल्या होत्या. त्यातच क्षेत्र कमी होईल, असाही अंदाज होता. परंतु गतवर्षीच्या तुलनेत यंदा एक टक्का क्षेत्र घटले आहे. जूनमध्ये १४८.२ मिलिमीटर पाऊस झाला.

या सततच्या पावसामुळे पाणी साचून राहिल्याने पिकांची अपेक्षित वाढ झाली नाही. दुष्काळी पट्ट्यातील आटपाडी, जत, कवठेमहांकाळ तालुक्यात तूर, मूग, उडीद पिकास पोषक वातावरण असले, तरी पावसाचा खंड होताच. त्यामुळे या पिकांनाही काही अंशी फटका बसला असल्याचे चित्र आहे.

जिल्ह्यात जुलैमध्ये १८ दिवसांत ११७.३ मिलिमीटर म्हणजे ८६ टक्के पाऊस झाला. इस्लामपूर, शिराळा, मिरज या तालुक्यांत अपेक्षित पाऊस झाला. तर जत, आटपाडी दोन तालुक्यांत अवघा पाच दिवस पाऊस पडला. कवठेमहांकाळ तालुक्यात १२ दिवस पाऊस झाला. ऐन पीक वाढीचा काळ, फुलोरावस्थेचा काळ या दरम्यान पावसाचा खंड पडला आहे.

यामुळे पिकांची वाढ खुंटली आहे. त्यामुळे शेतकरी चिंताग्रस्त झाला आहे. पीक जगविण्यासाठी शेतकऱ्यांची धडपड सुरू आहे. जत तालुक्याच्या पूर्व भागात हंगाम वाया जाण्याची भीतीही निर्माण झाली होती. अशा परिस्थिती शेतकऱ्यांनी पिके पाणी देऊन जगवली आहेत. जुलैमधील पहिल्या आठवड्यात १६ मिलिमीटर पाऊस झाला आहे.

वास्तविक, बुधवारी (ता. ६) जिल्ह्यातील दुष्काळी तालुक्यातील आटपाडी, जत या दोन तालुक्यांत सर्वाधिक पाऊस झाला. तर इतर तालुक्यांत कमीअधिक पावसाने हजेरी लावली. त्यामुळे शेतकऱ्यांना काहीसा दिलासा मिळाला. आणखी काही दिवस अशीच परिस्थिती राहिल्यास पुढे काय होणार, असा प्रश्‍न उपस्थित होऊ लागला आहे.

कृषी विभागाची निरीक्षणे

मका ः पीक उगवण अवस्थेत आहे. सततच्या पावसामुळे पीक पिवळे पडले असून शिराळा तालुक्यात अल्प प्रमाणात लष्करी अळीचा प्रादुर्भाव आढळून आला आहे.

उडीद ः पिकावर मावा किडीचा अल्प प्रमाणात प्रादुर्भाव आढळून आला आहे.

सोयाबीन ः पाने खाणारी अळी व खोड किडीचा प्रादुर्भाव आहे.

तूर ः पीक वाढीच्या अवस्थेत असून शेंडा मारण्याचे काम सुरू आहे.

मूग ः अनेक ठिकाणी फूल कळीची अवस्था आहे.