Ghodegaon News: आंबेगाव तालुक्याने तहसील कार्यालयात असलेल्या घोडेगाव येथे शेतीविषयक जुने सातबारा, फेरफार व इतर महसुली कागदपत्रे शुल्क भरूनसुद्धा वेळेवर मिळत नसल्याने शेतकऱ्यांना अनेकदा हेलपाटे मारावे लागत आहे. तहसीलदार घोडेगाव यांनी शेतकऱ्यांना वेळेवर कागदपत्र उपलब्ध होण्यासाठी कार्यवाही करावी. अन्यथा आंदोलन करण्याचा इशारा किसान सभेच्या पदाधिकाऱ्यांनी दिला आहे.

शेतकरी बांधवांना आपल्या शेतीविषयक जुने सातबारे, फेरफार वा इतर महसुली कागदपत्रे सातत्याने लागत असतात. त्यासाठी ते घोडेगाव येथील तहसील कार्यालयाकडे अर्ज करतात. शासकीय फी ही भरतात. पण अशी कागदपत्रे अनेक वेळा शेतकरी बांधवांना वेळेवर मिळत नाही. कागदपत्रांसाठी अनेक वेळा घोडेगाव येथील तहसील कार्यालयात हेलपाटे मारावे लागतात. यात शेतकऱ्यांचा प्रचंड पैसा व वेळ खर्ची जातो. या पार्श्वभूमीवर किसान सभेच्या आंबेगाव तालुका समितीने घोडेगाव तहसील कार्यालयास निवेदन सादर करून पुढील मागण्या मान्य केलेल्या आहेत.

या मागण्यांची पूर्तता न झाल्यास किसान सभेच्या वतीने घोडेगाव तहसील कार्यालयासमोर धरणे आंदोलन केले जाणार आहे. शेतकऱ्यांना वेळेवर कागदपत्रे उपलब्ध होण्यासाठी किसान सभेच्या वतीने सातत्याने पाठपुरावा करण्यात येईल, अशी माहिती किसान सभेचे डॉ. अमोल वाघमारे, कृष्णा वडेकर, अशोक पेकारी, राजू घोडे, रामदास लोहकरे, कमल बांबळे, दत्ता गिरंगे, सुभाष भोकटे, पुंडलिक असवले यांनी दिली आहे.

किसान सभेच्या मागण्या

शेतकरी बांधवांना कोणत्याही जुन्या कागदपत्रांची मागणी केल्यानंतर त्यांना ती माहिती वा कागदपत्रे विशिष्ट वेळेत मिळावी.

कोणतेही कागदपत्र किती दिवसांत मिळेल याची माहिती देणारी नागरिकांची सनद, अभिलेख कक्षाच्या दर्शनी भागात लावावी.

एखादा अभिलेख मिळत नसेल तर कोणाकडे त्याची तक्रार करायची याबाबत तक्रार अधिकारी निश्चित करावा व त्यांची माहिती दर्शनी भागात लावावी.

नागरिकाने मागणी केलेला अभिलेख, जुने कागदपत्र दे निश्चित कोणत्या दिवशी मिळेल याची माहिती नागरिकाला अर्ज दिला त्याच दिवशी सांगावी.

घोडेगाव कार्यालयांतर्गत जी झेरॉक्स मशिन आहे तिथे तिचे दर निश्चित करून त्या दराची माहिती बोर्ड वर दिसावी.

अभिलेख कक्षात कर्मचारी कमी असतील तर तेथे तत्काळ करार तत्त्वावर माणसे भरावेत. अभिलेख कक्षातील कर्मचारी यांना ओळखपत्र असावे.