Jalgaon News : खानदेशात पाच ते सात अश्वशक्तीच्या पंपांचे वीजबिल माफ केल्याचे दाखले, बिले वितरण वीज कंपनीने गावोगावी केले. परंतु अनेक लहान शेतकरी कृषिपंपांच्या वीज संयोजनासाठी वणवण करीत आहे. वीज शेतीसाठी मिळत नसल्याने बागायतीला अडसर येत आहे.

अनेक शेतकरी मागील वर्षभरापासून विजेची मागणी करीत आहेत. अर्ज, वीज मागणी प्रस्ताव दिले. शुक्ल भरण्याची तयारी केली. परंतु मागील उन्हाळ किंवा रब्बी हंगामातही वीज संयोजन मिळाले नाही.

आता या रब्बीतही विजेसाठी शेतकरी भटकंती करीत आहेत. जळगाव, धुळे सुमारे अडीच हजार नवे वीज संयोजन मागणीचे प्रस्ताव रखडले आहेत. शासकीय विहीर योजनांचे लाभार्थीदेखील विजेची मागणी करीत आहेत. वीजबिल माफी केली जाते. पण नवे संयोजन का पाच व साडेसात अश्‍वशक्तीसाठी दिले जात नाही, असा प्रश्‍न शेतकरी करीत आहेत. शेतकरी आपली शेती सिंचनाखाली आणण्यासाठी विहिरी, कूपनलिका तयार करतात.

परंतु नवे रोहित्र घ्यावे लागेल, संबंधित भागातील रोहित्रावर नवे संयोजन जोडता येणार नाही, तशी परवानगी नाही, नव्या रोहित्रासाठी एक लाख रुपये खर्च येईल, अशी बतावणी वीज वितरण कंपनीमधील काही एजंट करतात. शेतकऱ्यांची अडचण अधिकची वाढत असून, ही समस्या कोणाकडे सांगावी व मार्ग कसा काढावा, असा प्रश्‍न शेतकऱ्यांसमोर आहे.

या समस्येची दखल घ्यायला अधिकारी तयार नाहीत वीज वितरण कंपनीतर्फे विजेची उपलब्धता, सतत किंवा शासनानुसार अवर्षणप्रवण भागातील अतिपाणी उपसा अशी कारणे सांगून शेतकऱ्यांना नवे वीज संयोजन कृषिपंपांना दिले जात नसल्याची माहिती आहे. शेतकरी कूपनलिका किंवा विहिरीला वीज संयोजन नसल्याने घेऊ शकले नसल्याने बागायती शेती करणेही अशक्य झाले आहे.