Sangli News : सेंद्रिय शेतीची काळाची गरज आहे. त्यामुळे शासनाने सेंद्रिय शेतीचे धोरण आखले आहे. शेतकऱ्यांनी सेंद्रिय शेती करण्यासाठी पुढाकार घेतला पाहिजे. जत तालुक्यात सेंद्रिय शेती करण्यासाठी वाव आहे, असे मत आत्मा प्रकल्प संचालक जाबुवंत घोडके यांनी व्यक्त केले.

करजगी (ता. जत) येथे कृषी तंत्रज्ञान व्यवस्थापन यंत्रणा आत्मा, अंतर्गत परंपरागत कृषी विकास योजना (सेंद्रिय शेती) २०२३-२४ अंतर्गत गाव पातळीवरील शेतकरी प्रशिक्षण पार पडले. या वेळी घोडके बोलत होते.

घोडके म्हणाले, की रासायनिक शेतीमुळे जमिनीची सुपीकता कमी होत असून खर्चाची वाढ होत आहे. शासनाने सेंद्रिय शेती बाबत धोरणे तयार केली आहेत. सेंद्रिय शेतीचे प्रमाणिकरण व त्यासंबंधीचे रेकॉर्ड जतन केले जाणार आहेत. त्यामुळे सेंद्रिय उत्पादनांना बाजारपेठ उपलब्ध होईल.

या शिबिरात स्वनिर्मित सेंद्रिय पद्धतीची पीक वृद्धीवर्धक, शेतातील कीड व रोग निरीक्षण व सर्वेक्षण, सेंद्रिय प्रमाणिकरण मानके, शेतकरी दैनंदिनित नोंद करणे, पुढील हंगामाची पूर्वतयारी व नियोजन आदी विषयांचे मार्गदर्शन करण्यात आले. कामगंध सापळे, निळे व पिवळे चिकट सापळे, पक्षी थांबे, दशपर्णी अर्क, अमिल अर्क, पाच टक्के निंबोळी अर्क, लमीत अर्क, ब्रह्मास्त्र, जीवामृत आदी निविष्ठानिर्मिती आदीविषयी माहिती देण्यात आली. या वेळी शेतकरी दैनंदिनीचे वाटप करण्यात आले.

या वेळी उपप्रकल्प संचालक, आत्मा, सांगली राजाराम खरात, ज्ञानयोगी सिद्धेश्वर स्वामीजी हायस्कूलचे संस्थापक चेअरमन रेवाप्पा चन्नाप्पा पट्टणशेट्टी, हायस्कूलचे मुख्याध्यापक शैलेंद्र अरळी, तालुका तंत्रज्ञान व्यवस्थापक जत रविकरण पवार, सहायक तंत्रज्ञान व्यवस्थापक राजेंद्र डोळी, अमसिद्ध हंजगी, शेतकरी लाभार्थी उपस्थित होते.