Farmers Protest Update : कृषी क्षेत्राला जागतिक व्यापार संघटनेच्या (डब्लूटीओ) कक्षेतून बाहेर काढण्याची मागणी करत पंजाब आणि हरियानातील शेतकऱ्यांनी सोमवारी (ता. २६) महामार्गांवर ठिकठिकाणी आंदोलन केले. या वेळी महामार्गांच्या दुतर्फा ट्रॅक्टर आणि अन्य वाहने उभी करण्यात आली होती.

सध्या पंजाब-हरियानाच्या खानौरी आणि शंभू सीमेवर हजारो शेतकरी आंदोलक ठाण मांडून बसले असून पिकांनी हमी भाव दिला जावा, अशी त्यांची आग्रही मागणी आहे. या शेतकऱ्यांनी दुपारी बारा ते तीन या वेळेत ‘डब्लूटीओ छोडो’ अशी घोषणा देत आंदोलन केले.

पंजाबमधील शेतकऱ्यांनी जालंधर-जम्मू महामार्गावर वाहने उभी केली होती. येथे दोबा किसान समितीचे प्रदेशाध्यक्ष जंगवीरसिंह चौहान यांनी शेतकऱ्यांच्या आंदोलनाचे नेतृत्व केले. शेतकऱ्यांनी तांडा येथील बिजली घर चौकामध्ये वाहने उभी केली होती. ‘डब्लूटीओ’चे धोरण हे शेतकरीविरोधी असल्याचा आरोप आंदोलकांनी केला आहे.

किमान हमी भावाच्या अंमलबजावणीबरोबरच स्वामिनाथन आयोगाच्या शिफारशी लागू करण्यात याव्यात, अशी मागणी शेतकऱ्यांनी केली आहे. अमृतसरमध्ये अंजाला, जंदियाला गुरू, आणि बियास महामार्गांभोवती शेतकऱ्यांनी वाहने उभी केली होती.

लुधियाना-चंडीगड महामार्गाच्या शेजारी देखील वाहने उभी करून ‘डब्लूटीओ’चा निषेध करण्यात आला. हरियानात पन्नास ठिकाणांवर शेतकऱ्यांनी आंदोलन केले.