Milk Subsidy Rate : गाईच्या दुधाला चाळीस रुपये प्रतिलिटर दर मिळावा तसेच सात महिन्याचे थकीत दूध अनुदान ताबडतोब शेतकऱ्यांच्या खात्यावर वर्ग करावे. यासह अन्य मागण्यांसाठी रघुनाथ दादा प्रणीत शेतकरी संघटनेच्यावतीने गुरूवार (ता.३०) कोल्हापूर जिल्हाधिकारी कार्यालयावर शेतकऱ्यांनी गाईसह मोर्चा काढला. दसरा चौक येथे गाईचे पूजन करून मोर्चाला सुरुवात झाली. यावेळी शेतकऱ्यांनी सरकारविरोधात जोरदार घोषणाबाजी केली.

शेतकरी संघटनेचे नेते माणिक शिंदे म्हणाले की, "सरकारने घोषित केलेले सात महिन्याचे थकीत अनुदान शेतकऱ्यांच्या खात्यावर अद्याप जमा करण्यात आले नाही. दुधाला २७ रुपये इतका कमी दर दिल्यामुळे दूध उत्पादक तोट्यात आलेले आहेत. याचा निषेध म्हणून आम्ही आंदोलन करीत आहोत. अशी माहिती शिंदे यांनी दिली.

"सरकारने गाईंच्या दुधाला ४० रुपये दर व ७ महिन्यापासून थकीत अनुदान शेतकऱ्यांच्या खात्यावर जमा केले नाही तर जिल्हाधिकारी कार्यालयासमोर शेतकरी दुधाची आंघोळ करतील. मंत्र्यांच्या वाहनांवर दुधाच्या बाटल्या फेकून निषेध व्यक्त करण्यात येईल. असा शिंदे यांनी इशारा दिला.

"गाईच्या दुधाला अनुदान देण्याचा निर्णय झाला. मात्र, राज्यात महायुतीचं सरकार स्थापन होऊनही याबाबतीत अजून निर्णय झालेला नाही. गत वर्षातील जून ते सप्टेंबर महिन्यातील १८० कोटी तर, ऑक्टोबर ते नोव्हेंबर महिन्याचे ५५० कोटी असे एकूण ७३० कोटींच्या निधीला मंजुरी दिली. मात्र, राज्य सरकारच्या तिजोरीत ठणठणात असल्याने गाय दूध उत्पादकांना दुधावरील अनुदानाची रक्कम मिळालेली नाही". अशी टीका शिंदे यांनी केली.

शेतकरी संघटना उपाध्यक्ष ज्योतीराम घोडके म्हणाले की, "जर दूध उत्पादकांच्या मागण्या मान्य झाल्या नाहीत तर जिल्हाधिकारी कार्यालयासमोर आत्मदहनाचा व उपोषणाचा इशारा दिला". यावेळी अनिल जाधव, जयश्री सरीकर, मच्छिंद्र पाटील, सतीश चव्हाण, प्रदीप अस्वले, बाबासो सूर्यवंशी, अनिता सुतार इत्यादी दूध उत्पादक शेतकरी यावेळी उपस्थित होते.