Amravati News: हमीभावाने सोयाबीन खरेदीसाठीची भारतीय राष्ट्रीय कृषी सहकारी विपणन महासंघाची (नाफेड) यंत्रणा शेतकऱ्यांसाठी अडचणीची असून यात लूट होत असल्याचा आरोप करीत या व्यवस्थेत सुधारणा करावी, अशी मागणी अंजनगावबारी येथील शेतकरी रवींद्र मेटकर यांनी केली आहे. केंद्रीय कृषिमंत्री शिवराजसिंग चौहान यांना पत्र लिहीत ‘नाफेड’ यंत्रणेवर शेतकऱ्यांच्या छळवणुकी संदर्भाने विविध आरोप श्री. मेटकर यांनी केले आहेत.

मेटकर यांच्या पत्रानुसार, केंद्र सरकारने सोयाबीनला ४८९२ रुपयांचा हमीभाव जाहीर केला आहे. परंतु खुल्या बाजारात गेल्या दोन वर्षांपासून सोयाबीनचे दर हमीभावापेक्षा कमीच राहिले आहेत. ३८०० ते ४००० रुपये प्रति क्‍विंटल याप्रमाणे सोयाबीनची खरेदी खुल्या बाजारात होत आहे. त्यामुळेच आपल्या शेतीमालाला चांगला दर मिळावा या अपेक्षेने शेतकरी ‘नाफेड’ला सोयाबीन विक्रीवर भर देत आहेत.

रवींद्र मेटकर यांच्या माहितीनुसार, ‘नाफेड’ला सोयाबीन विक्रीसाठी त्यांनी एक जानेवारी रोजी ऑनलाइन नोंदणी केली होती. त्यांना त्यांचे ४२ क्‍विंटल सोयाबीन विक्रीसाठी आणण्याचा एसएमएस २९ जानेवारी रोजी प्राप्त झाला. सोयाबीन बाजार समितीमधील नाफेड केंद्रावर नेल्यानंतर वीस रुपये प्रति क्‍विंटल दराने हमाली आकारण्यात आली. छळवादाची ही मालिका एवढ्यावरच न थांबता सकाळी सहा ते रात्री दहा पर्यंत मोजमाप न करता ताटकळत ठेवण्यात आले.

त्यानंतर ३१ जानेवारी रोजी मोजमाप करताना ४२ पैकी केवळ २५ क्‍विंटलच सोयाबीन खरेदी करण्यात आले. एका दिवशी एका शेतकऱ्याकडून २५ क्‍विंटलच सोयाबीन खरेदी केली जात असल्याच्या नियमाबद्दल सांगण्यात आले. त्यामुळे उर्वरित १७ क्‍विंटल सोयाबीन परत वाहनात भरत त्याची हमाली चुकवीत घरी परत नेणे शक्‍य नसल्याने खुल्या बाजारात कमी दराने विकावे लागले. ‘नाफेड’च्या अमरावती केंद्रावर व्यापारी बाजार समितीमधूनच ४००० रुपये क्‍विंटलने सोयाबीन खरेदी करुन त्याची ‘नाफेड’ला ४८९२ रुपयाने विक्री करीत असल्याचा गंभीर आरोपही मेटकर यांनी केला आहे.