Nephad News : शेतीमालाच्या बाजारभावासाठी संघर्ष करणाऱ्या शेतकऱ्यांसाठी सध्याची स्थिती दुष्काळात तेरावा महिना ठरत आहे.

शासकीय यंत्रणेच्या तुघलघी कारभारामुळे पुणेगांव कालव्याचे हक्काच्या आवर्तनावर पाणी सोडण्याची वेळ रेडगाव (ता. निफाड) येथील शेतकऱ्यांवर आली आहे.

द्राक्षबागासह शेतीचे पीक धोक्यात आले आहे. यावरून संतप्त शेतकऱ्यांनी पिंपळगावच्या पाटबंधारे विभागाच्या कार्यालयात ठिय्या आंदोलन केले.

पुणेगावच्या धरण कालव्याचा उपप्रवाह असलेली चारी रेडगावला सुमारे अर्धा किमी अंतराने वळसा घालून जाते. गेल्या आठ वर्षांपासून कालव्याचे आवर्तनामुळे शेतीक्षेत्र ओलिताखाली येऊन सिंचनासह पिण्याला मिळत असल्याने द्राक्ष बागाचे क्षेत्रात वाढ होऊन सुमारे २०० हेक्टरपर्यंत पोहोचले.

तर कांदा, उसाचे क्षेत्रही सुमारे १०० हेक्टरपर्यंत पोहोचले. गेल्या आठ वर्षांपासून रब्बीच्या पिकांसह द्राक्ष बागांना आवर्तन दिले जात होते. पण यंदा मात्र आवर्तनाचे पाणी रेडगावपासून एक अंतरावर खडकजांब येथेच अडकले आहे.

कालव्याला सोडण्यात आलेल्या आवर्तनाचे पाणी चारीद्वारे पोहोचत नसल्याने उभ्या द्राक्ष बागा संकटात सापडल्या आहेत. त्यामुळे शेतकऱ्यांच्या तोंडचे पाणी पळाले आहे. त्यामुळे शंभरहून अधिक शेतकऱ्यांनी पिंपळगावच्या पाटबंधारे विभागाचे कार्यालय गाठले.

संबंधित अधिकारी जागेवर नसल्याने भ्रमणध्वनीद्वारे शेतकऱ्यांनी त्यांच्याशी संपर्क साधला. पण कालव्याच्या चारीच्या स्थितीमुळे पाणी पोहोचत नाही, पाण्याचे आरक्षण रद्द केले अशी उडवाउडवीची उत्तरे अधिकाऱ्यांनी दिल्याचे शेतकऱ्यांनी सांगितले.

दरम्यान, संतप्त शेतकऱ्यांनी थेट कार्यालयातच ठिय्या आंदोलन सुरू केले. जोरदार घोषणाबाजीने कार्यालय दणाणून सोडले. आमदार दिलीप बनकर, माजी आमदार अनिल कदम यांच्याशीही शेतकऱ्यांनी संपर्क करून व्यथा मांडल्या.

या वेळी सरपंच गोरख चव्हाण, पोलिस पाटील महेंद्र जाधव, भाऊसाहेब पिठे, विजय चव्हाण, सोमनाथ चव्हाण, किरण सरोदे, सागर चव्हाण, योगेश चव्हाण, विलास चव्हाण, अण्णा सरोदे, दीपक सरोदे, विकास चव्हाण, ज्ञानेश्‍वर चव्हाण, विजय सरोदे, भाऊसाहेब चव्हाण, संकेत चव्हाण, रवींद्र सरोदे, गोरख सरोदे, संदीप चौधरी, तुकाराम चव्हाण, वैभव चव्हाण, संदीप चव्हाण, राकेश चव्हाण, बाळासाहेब चव्हाण आदी उपस्थित होते.