Amravati News : फळपीक विमा काढून देतो, अशी बतावणी करून अनेक शेतकऱ्यांकडून पैसे घेऊन त्यांची फसवणूक करण्यात आल्याची बाब उजेडात आली आहे. नीलेश दिनेश देशमुख (वय ३९) यांच्या तक्रारीवरून वरूड पोलिसांनी संशयित अमोल चरणदास क्षीरसागर (वय ३०, शिवाजीनगर, वरुड) विरुद्ध गुन्हा दाखल केला आहे.

अमोल क्षीरसागर याने नीलेश देशमुख सोबत आधी फळ पीकविमा काढून देण्याचे सांगून त्यांचा विश्‍वास संपादन केला. त्यानंतर त्यांच्याकडून पैसे घेतले. क्षीरसागर याच्या संपर्कात गावातील इतरही काही शेतकरी होते.

त्यांच्या कडूनही अमोल क्षीरसागरने असेच आमिष दाखवून पैसे घेतले. शेतकऱ्यांनी पैसे दिल्यानंतर त्याचा पुरावा संशयित अमोलकडे मागितला असता त्याने संबंधित शेतकऱ्यांना विम्याच्या संगणकीकृत पावत्या त्यांना दिल्या.

२ नोव्हेंबर २०२२ ते २६ नोव्हेंबर २०२२ या कालावधीत अमोल क्षीरसागर याने नीलेश देशमुखसह अन्य शेतकऱ्यांकडून जवळपास २ लाख २७ हजार ३८४ रुपये इतकी रक्कम घेतली. परंतु दोन वर्षांतही कोणालाही योजनेचा लाभ मिळाला नाही. सुरुवातीचे काही दिवस संशयिताने टाळून नेले. त्यामुळे तक्रार दाखल केली.