Solapur News: उत्तर सोलापूर तालुक्यातील दुधाचे गाव म्हणून ओळखल्या जाणाऱ्या बीबीदारफळ गावातील आदर्श गोपालक म्हणून पुरस्कारप्राप्त खडतरे बंधूच्या गोठ्यात तीन वर्षांपूर्वी चाळीस गाई होत्या. पण आता त्यांनी त्यांचा हा गोठा मोडला आहे. एकीकडे दुधाचे घसरते दर, दुसरीकडे चाऱ्याचे वाढते दर यामध्ये खर्च आणि नफ्याचे गणित जुळत नसल्याने थेट गोठाच मोडण्याची वेळ त्यांच्यावर आली आहे.

बीबीदारफळ गावात कोरोनाच्या साथीपूर्वी प्रतिदिन जवळपास दहा ते बारा हजार लिटर दूध संकलित केले जात होते. आठ ते नऊ संकलन केंद्रे दूध संकलित करत होती. या व्यवसायातून गावात दररोज पाच ते सहा लाखांची उलाढाल होत होती. यामध्ये दूध केंद्रांसह पशुखाद्य विक्री, दूध वाहतूक करणारी वाहने यांच्यासह इतर घटक सामील आहेत.

सध्याच्या दूध व्यावसायातील परिस्थितीमुळे हे सर्व घटक प्रभावित झाले आहेत. आजघडीला गावात फक्त चार ते पाच हजार लिटर दूध उत्पादित होत आहे. एकीकडे दुधाचे घसरते दर, चाऱ्याचे वाढते दर आणि शासनाकडून मिळणारे अनुदानही रखडत असल्याने दूध उत्पादक चांगलेच अडचणीत आले आहेत.

सोलापूरच्या दूध संकलनात पुणे जिल्ह्यातील मोठ्या खासगी व्यावसायिकांची मगरमिठी बसली आहे, यातील काही घटक सत्ताधारींसह विरोधी पक्षात बसले आहेत. त्यांच्या अभद्र युतीमुळे शासनाकडून दुधाचा दर एफआरपीच्या माध्यमातून ठरवणे, दुधातील भेसळ रोखणे, इतरराज्यांप्रमाणे सहकारी दूध संस्थांचा एकच ब्रॅण्ड तयार करणे यासह इतर निर्णय होत नाहीत. खासगी व्यावसायिकांच्या नफेखोरीमुळे दूध व्यवसाय आर्थिक अरिष्टात सापडला आहे, ही वस्तुस्थिती आहे.