Nashik News: कृषी विभागाच्या वतीने देवरगाव (ता. जि. नाशिक) येथे खरीप हंगाम क्रॉपसॅप संलग्न शेतीशाळा अंतर्गत भात पिकाच्या शेतीशाळा प्रथम वर्गाचे आयोजन हिरामण दगडू मोंढे यांच्या शेतावर करण्यात आले. या कार्यक्रमात जिल्हा अधीक्षक कृषी अधिकारी अभिमन्यू काशीद यांच्या मार्गदर्शनाखाली शेतकऱ्यांना आधुनिक शेती तंत्रज्ञानाची माहिती देण्यात आली.

शेतीशाळेमध्ये उपकृषी अधिकारी रविकर अहिरे यांनी शेती शाळेची प्रतिज्ञा घेतली. त्यानंतर तालुका कृषी अधिकारी क्रांती जाधव यांनी शेतीशाळेची प्रस्तावना केली. शेतकऱ्यांना शेतीशाळेची संकल्पना समजून सांगण्यात आली. शेतीशाळेचा प्रथम वर्ग असल्यामुळे ॲग्रीस्टॅक नोंदणी असलेल्या आणि सुधारित तंत्रज्ञान अवलंब करू इच्छित अशा २५ शेतकऱ्यांची निवड केलेली होती.

त्यांना सहायक कृषी अधिकारी भागवत वाघ यांनी बीजप्रक्रिया प्रात्यक्षिक करून दाखवले व भात लागवड चतुःसूत्री पद्धतीबाबत मार्गदर्शन केले. श्री. काशीद यांनी भात पिकाची योग्य रोपवाटिका तयारी, पाणी व्यवस्थापन, कीड व रोग नियंत्रण, खत व्यवस्थापन, युरिया ब्रिकेट वापर तसेच उत्पादनवाढीसाठी आवश्यक असलेल्या सुधारित तंत्रज्ञानावर मार्गदर्शन केले.

शेतीशाळा वर्गप्रसंगी देवरगावमधील शेतीशाळेमधील शेतकरी उपस्थित होते. अधिकाऱ्यांनी शेतात प्रत्यक्ष प्रात्यक्षिक घेऊन शेतकऱ्यांना विविध पद्धतींची माहिती दिली. भात लागवडीमध्ये येणाऱ्या अडचणी मांडण्यास सांगितले.

त्या अडचणींवर उपाय या वेळी सुचविले. कार्यक्रमात देवरगाव व परिसरातील अनेक शेतकरी मोठ्या संख्येने उपस्थित होते. शेतकऱ्यांनी उपयुक्त माहिती मिळाल्याबद्दल समाधान व्यक्त केले. अशा प्रकारच्या कार्यक्रमांचे आयोजन नियमित व्हावे, अशी अपेक्षा व्यक्त केली आणि शेतकऱ्यांनी बीज प्रक्रिया करूनच भात रोपवाटिका टाकण्याचे आवाहन करण्यात आले.