Sindhudurg News : भातखरेदीकरिता शासनाने ऑनलाइन नोंदणीची मुदत १५ जानेवारीपर्यंत वाढविली आहे. यापूर्वी ३१ डिसेंबरपर्यंत मुदत होती. मात्र अधिकतर शेतकरी नोंदणीपासून वंचित असल्याने शासनाने ही मुदत वाढविली आहे.

पणन हंगाम २०२३-२४ मधील खरीप हंगामातील भातविक्री करण्यापूर्वी शेतकऱ्यांनी ई-पीक पाहणीचा सात-बारा घेऊन नोंदणी करणे आवश्यक होते. त्यानुसार जिल्ह्यातील अनेक शेतकऱ्यांनी नोंदणी केली असून जिल्ह्यातील ४३ पैकी ३० हून अधिक भातखरेदी केंद्रांवर भातखरेदी सुरू झाली आहे.

शासनाने भातखरेदीकरिता आवश्यक असलेली ऑनलाइन नोंदणीची मुदत ३१ डिसेंबर होती. परंतु अनेक शेतकरी अद्याप नोंदणी करावयाचे राहिले आहेत. त्यामुळे जिल्ह्यातील तालुका खरेदी-विक्री संघाकडून नोंदणीची मुदत वाढवावी, अशी मागणी शासनाकडे करण्यात आली होती. त्यानुसार शासनाने १५ जानेवारीपर्यंत नोंदणीसाठी मुदतवाढ दिली आहे. हमीभाव खरेदीपासून शेतकरी वंचित राहू नयेत म्हणून हा निर्णय घेण्यात आला आहे.