Pune News: ‘‘सहकार आयुक्तालयाने राज्यात सात हजार नव्या प्राथमिक कृषी सहकारी सोसायट्या स्थापन करण्याची कार्यवाही करावी. त्यासाठी कोणाच्याही परवानगीची वाट पाहू नये,’’ अशा सूचना केंद्रीय सहकार राज्यमंत्री मुरलीधर मोहोळ यांनी दिल्या आहेत.

नाबार्ड अर्थात राष्ट्रीय कृषी व ग्रामविकास बॅंकेच्या ४४ व्या स्थापना दिन निमित्ताने शुक्रवारी (ता.१९) पुण्याच्या ‘यशदा’मध्ये आयोजित केलेल्या समारंभात ते बोलत होते. सहकार विभागाचे प्रधान सचिव प्रवीण दराडे, नाबार्डचे उपव्यवस्थापकीय संचालक जी. एस. रावत व मुख्य महाव्यवस्थापक श्रीमती रश्मी दराड तसेच राज्याचे सहकार आयुक्त दीपक तावरे व्यासपीठावर होते.

‘शिखर बॅंकेने थेट सोसायट्यांना कर्ज द्यावे’

नाबार्ड, शिखर बॅंक, जिल्हा बॅंक व नंतर सोसायटी अशी कृषी पतपुरवठ्याची रचना आहे. याबाबत श्री. मोहोळ म्हणाले, ‘‘सहकार पारदर्शक व विश्‍वासार्हदेखील झाले पाहिजे. त्यासाठी केंद्र पावले उचलत आहे. सहकारात येत्या दहा वर्षांत १७ लाख नवे मनुष्यबळ असून, त्यासाठी सहकार विद्यापीठाची स्थापना केंद्राने केली आहे. अडचणीतील जिल्हा बॅंकांच्या कार्यक्षेत्रात शिखर बॅंकेने थेट सोसायट्यांना पतपुरवठा करायला हवा. जिल्हा बॅंकांनाही सक्षम केले जाईल. कारण, बॅंका सक्षम झाल्याशिवाय सोसायट्या बळकट होणार नाहीत.’’

सहकारासाठी नवे मनुष्यबळ धोरण

प्रधान सचिव श्री. दराडे म्हणाले, की शिखर बॅंकेने सायबर सुरक्षेसाठी आणलेले सॉफ्टवेअर राज्यातील सर्व जिल्हा मध्यवर्ती सहकारी बॅंकांनी स्वीकारावे, यासाठी आमचा पाठपुरावा चालू आहे. यामुळे बॅंकांची सुरक्षा प्रणाली वाढेल व सायबर गुन्हेदेखील कमी होतील. देशात सर्वाधिक सोसायट्या राज्यात असूनही त्या बहुउद्देशीय होण्याचे प्रमाण कमी आहे. ते वाढविण्यासाठी प्रत्येक जिल्हा बॅंकेने सोसायटी सक्षमीकरण कक्ष काढायला हवा.

‘एनडीडीबी’चे श्रीधर म्हणाले, की देशात पहिल्या श्‍वेतक्रांतीमुळे भारत दुग्ध उत्पादनात जगात प्रथम स्थानी गेला. आता दुसरी श्वेत क्रांती येत आहे. त्यासाठी दुग्धविकास क्षेत्रात एनडीडीबीने सोसायट्यांना बहुउद्देशीय होण्याचा निर्धार केला आहे. नाबार्डचे रावत म्हणाले, की आम्ही सध्या केंद्रीय सहकार मंत्रालयासोबत नवे मनुष्यबळ धोरण तयार करीत आहोत. त्याचा स्वीकार केल्यास सहकारातील मनुष्यबळ प्रणाली कार्यक्षम होईल.

सोसायट्या व जिल्हा बॅंकांचा गौरव

नेरपिंगाई (जि.अमरावती), चाकूर (लातूर), पिंपरी राजा (छत्रपती संभाजीनगर), धसाई (ठाणे), श्री सातेरी प्रासादिक (सिंधुदुर्ग), देलनवाडी आदिवासी विकास (गडचिरोली), नागभीर (चंद्रपूर), जवळा (अहिल्यानगर), नामपूर बृहत् (नाशिक) आणि अंकलखोप (सांगली) या सोसायट्यांसह अकोला वाशीम, परभणी, ठाणे, गडचिरोली,

अहिल्यानगर व पुणे या जिल्हा मध्यवर्ती सहकारी बॅंकांचा उत्कृष्ट कामकाजाबद्दल नाबार्डने गौरव केला. महाराष्ट्र राज्य सहकारी (शिखर) बॅंकेचे अध्यक्ष व प्रशासक विद्याधर अनास्कर, रायगड जिल्हा बँकेचे अध्यक्ष जयंत पाटील, राष्ट्रीय दुग्धविकास मंडळाचे वरिष्ठ महाव्यवस्थापक व्ही. श्रीधर तसेच राज्याच्या सहकार व बॅंकिंग क्षेत्रातील मान्यवर या वेळी उपस्थित होते.