Akola News : भूमिहिनांना पाच एकरापर्यंत जमिनी द्याव्यात, अशी आमची वर्षानुवर्षे मागणी आहे. शासनाने ही बाब विचारात घेत एका शासकीय समितीची स्थापना करावी. यासाठी आपण मुख्यमंत्री, उपमुख्यमंत्र्यांची भेट घेऊन मागणी करणार आहोत, अशी माहिती रिपाईचे नेते, केंद्रीय राज्यमंत्री रामदास आठवले यांनी दिली.

पक्षाच्या मेळाव्यासाठी अकोला दौऱ्यावर आले असता त्यांनी शासकीय विश्रामगृहात पत्रकारांशी संवाद साधला. आज बरीच जमीन पडीक आहे. या जमिनी राज्यातील भूमिहिनांना देण्यासाठी सातत्याने मागणी होत आहे.

पक्षाचीही ही मागणी आहे. या जमिनी वहिती झाल्या तर शहरांकडे येणारे लोंढे थांबतील. झोपडपट्ट्या वाढणार नाहीत. स्थानिक पातळीवर हातांना काम मिळेल, असेही ते म्हणाले.

राज्यात ४५ जागा जिंकणार

आगामी लोकसभा निवडणुकीत महायुती ४८ पैकी किमान ४५ जागांवर जिंकेल असा दावाही आठवले यांनी पत्रकार परिषदेत केला. राज्यात दोन जागा रिपाईला मिळण्यासाठी आपण अमित शाह, जे. पी. नड्‍डा यांची लवकरच भेट घेणार आहोत. देशात एनडीएला विरोध करण्यासाठी विरोधक एकवटले आहेत.

मात्र, मोदींच्या नेतृत्वात देशभरात विकास होत आहे. आज रस्त्यांचे जाळे नितीन गडकरींनी उभे केले. ५० कोटी जनधन बँक खाती उघडण्यात आली. पंतप्रधान आवास योजनेतून देशात चार कोटी नागरिकांना घरे मिळाली आहेत. अशा अनेक योजनांचे लाभ सामान्यांपर्यंत पोचले. मोदी हे स्वतः सामान्यांच्या विकासासाठी अग्रेसर नेतृत्व आहे.

देशात त्यांच्या नेतृत्वात किमान ४०० जागा जिंकल्या जातील, असेही ते म्हणाले. काँग्रेसने आजवर दलितांची फक्त मते वापरली, अशी टीकाही त्यांनी केली. विदर्भाच्या मुद्यावर बोलताना त्यांनी या भागाचा विकास व्हायला हवा. शासनाने विदर्भातील रखडलेले प्रकल्प पूर्णत्वास नेण्यासाठी पाठबळ दिले पाहिजे.