Crop Management in Kokan:

हळद

पक्व हळद पिकाची काढणी करावी. कंद व हळकुंडे वेगवेगळी करून हळद शिजवून ताडपत्रीवर सिमेंट काँक्रीटच्या खळ्यावर वाळविण्यासाठी पसरून ठेवावी. हळद वाळविण्यासाठी १० ते १५ दिवस लागतो.

वांगी, मिरची

वांगी पिकास नत्र खताची तिसरी मात्रा ४ ग्रॅम युरिया प्रति रोप पुनर्लागवडीनंतर दोन महिन्यांनी द्यावी. मिरची पिकाला फळधारणेच्या वेळी नत्र खताची तिसरी मात्रा ३ ग्रॅम युरिया देण्यात यावी.

वांगी, मिरची, टोमॅटो पिकावर तुडतुडे व मावा किडींचा प्रादुर्भाव दिसून येण्याची शक्यता आहे. प्रादुर्भाव दिसून येत असल्यास त्वरित नियंत्रणासाठी उपाययोजना कराव्यात. रसशोषक किडींच्या व्यवस्थापनासाठी पिकामध्ये पिवळे चिकट कागदाचे सापळे प्रति गुंठा १ सापळा या प्रमाणे लावावेत.

कलिंगड

फळधारणा अवस्थेत असलेल्या कलिंगड पिकाला ३ ते ४ दिवसांच्या अंतराने नियमित पाणी द्यावे.

कलिंगडाच्या फळांचे सूर्यप्रकाशापासून बचाव करण्यासाठी फळे भाताच्या पेंढ्याने किंवा गवताने झाकून घ्यावीत. काढणीपूर्वी कलिंगड पिकास ६ ते ७ दिवस आधी पाणी बंद करावे.

कलिंगड हे फळ काढणीस तयार झाले की नाही हे ओळखण्यासाठी फळावर टिचकी मारावी. टिचकी मारल्यास तयार फळांचा ‘टण... टण’ असा आवाज येतो. तयार फळांचा जमिनीलगतचा रंग पिवळसर होतो. तयार फळांच्या देठाजवळील लतातंतू सुकलेले असतात. अशा फळांची काढणी करावी.

- डॉ. विजय मोरे, ९४२२३७४००१

(नोडल अधिकारी, कृषी विद्या विभाग, डॉ. बाळासाहेब सावंत कोकण कृषी विद्यापीठ आणि ग्रामीण कृषी मौसम सेवा योजना, दापोली)