Yavatmal News : आत्महत्याग्रस्त (कै.) मनोज राठोड यांच्या कुटुंबीयांना रोजगाराच्या दिलेल्या आश्‍वासनाची पूर्तता करीत कृषिमंत्री धनंजय मुुंडे यांच्या वतीने ९ शेळ्या व एक बोकुड येरद या गावी पोहोचविण्यात आला.

या माध्यमातून रोजगाराचा पर्याय उपलब्ध झाल्याने आत्महत्याग्रस्त कुटुंबीयांनी कृषिमंत्र्यांप्रती आभार व्यक्‍त केले आहेत. यवतमाळपासून अवघ्या काही अंतरावर असलेल्या येरद येथील मनोज राठोड यांनी १५ ऑगस्ट रोजी गळफास घेत आत्महत्या केली होती.

दरम्यान, १८ ऑगस्ट रोजी यवतमाळ जिल्हा दौऱ्यावर असलेल्या कृषिमंत्री धनंजय मुंडे यांनी मनोज यांची पत्नी व चार मुलींची भेट घेत त्यांचे सांत्वन केले. त्यासोबतच या कुटुंबीयांच्या मागणीनुसार रोजगाराचे साधन देणार असल्याचे जाहीर केले होते.

त्यानुसार गुरुवारी (ता. २६) येरद या गावी शिलाई मशिन, पिको फॉल मशिन तसेच रोख मदत देण्यात आली. शुक्रवारी (ता. २७) पुन्हा याच कुटुंबीयांच्या मागणीनुसार त्यांना ९ शेळ्या व एक बोकुड याप्रमाणे घरपोच देण्यात आले.

शेतीपूरक शेळीपालनातून रोजगाराचा पर्याय उपलब्ध झाल्याने राठोड कुटुंबीयांनी कृषिमंत्र्यांप्रती आभार व्यक्‍त केले.