Baramati News : कृषी क्षेत्रात कृत्रिम बुद्धिमत्तेचा (आर्टिफिशियल इंटेलिजन्स) वापर बारामतीस्थित ॲग्रिकल्चरल डेव्हलपमेंट ट्रस्टने मायक्रोसॉफ्ट, ऑक्सफर्ड, बिल गेट्स फाउंडेशन यांच्या मदतीने प्रभावीपणे सुरू केला आहे.

मायक्रोसॉफ्टचे मुख्य कार्यकारी अधिकारी सत्या नाडेला यांनी या बाबतची माहिती समाजमाध्यमांवर प्रसारित केल्यानंतर अमेरिकेतील टेस्ला व स्पेस एक्स कंपनीचे सर्वेसर्वा प्रसिद्ध उद्योगपती इलॉन मस्क यांनीही सोमवारी (ता.२४) त्याची स्वतःहून दखल घेत ‘आर्टिफिशियल इंटेलिजन्स सर्व काही बदलू शकते’, अशी प्रतिक्रिया ‘एक्स’वर व्यक्त केली आहे.

कृत्रिम बुद्धिमत्तेचा वापर करून कमी खर्चात अधिक उत्पादन देणारी शेती शक्य आहे, ही बाब बारामतीतील ॲग्रिकल्चरल डेव्हलपमेंट ट्रस्टने ‘मायक्रोसॉफ्ट’ या जगप्रसिद्ध कंपनीच्या मदतीने सिद्ध करून दाखविली आहे. ‘मायक्रोसॉफ्ट’चे मुख्य कार्यकारी अधिकारी सत्या नाडेला यांनी नुकतीच दिल्ली येथे या प्रकल्पाची दखल घेत भविष्यात हा प्रकल्प भारतातील छोट्या शेतकऱ्यांसाठी वरदान ठरेल, अशी अपेक्षा व्यक्त केली होती. त्यांनी स्वतः याबाबतची माहिती सोशल मीडियाच्या माध्यमातून जगभरात पोहोचवली होती. त्याची दखल इलॉन मस्क यांनी घेतली आहे.

याविषयी ॲग्रिकल्चरल डेव्हलपमेंट ट्रस्टचे चेअरमन राजेंद्र पवार म्हणाले, ‘‘आर्टिफिशियल इंटेलिजन्सच्या माध्यमातून कमी खर्चात अधिक उत्पादन देणारी शेती शक्य आहे, ही बाब ऊस पिकाच्या माध्यमातून ट्रस्टने सिद्ध केली आहे. संस्थेचे विश्वस्त प्रतापराव पवार, डॉ. अजित जावकर यांच्यासह मुख्य कार्यकारी अधिकारी नीलेश नलावडे व त्यांच्या सर्वच सहकाऱ्यांच्या अथक प्रयत्नातून हे यश मिळाले आहे. इलॉन मस्क यांनी याची दखल घेणे ही बाब आशादायक आहे.’’