Sangli News : ऊस पिकात सुयोग्य असे व्यवस्थापन केले तर ४ ते ५ खोडव्यांचे पीक घेणे व चांगले उत्पादन घेणे शक्य असल्याचे मत वसंतदादा शुगर इन्स्टिट्यूटचे निवृत्त शास्त्रज्ञ एस. बी. माने पाटील यांनी व्यक्त केले. हिंगणगाव बुद्रुक (ता. कडेगाव) येथे डॉ. पतंगराव कदम सोनहिरा साखर कारखान्याने राष्ट्रीय कृषी दिनाचे औचित्य साधून आयोजित ऊस पीक परिसंवाद कार्यक्रमात एस. बी. माने पाटील बोलत होते.

या वेळी शेती अधिकारी प्रशांत कणसे, उपशेती अधिकारी वैभव जाधव सरपंच महेश कदम, सुरेश क्षीरसागर यांच्यासह शेतकरी उपस्थित होते. माने पाटील म्हणाले, ‘‘ऊस लागणीवेळी मशागत, बियाणे, खतांचा बेसल डोस, मजुरी खर्च, पिकातील आंतरमशागतीवर मोठ्या प्रमाणात खर्च करावा लागतो.

तुलनेत लागण ऊस तुटल्यानंतर खोडवा नियोजनबद्ध रीतीने ठेवल्यास कमी खर्चात जास्त उत्पादन घेण्यास मदत होते. पाचट कुट्टी करून घेतल्यानंतर खोडव्यातील पाचटावर युरिया, सिंगल सुपर फॉस्फेट टाकून घेतल्यानंतर चांगल्या प्रकारचे कंपोस्ट खत तयार होते. पाचट कुजविणारे डिकंपोझिंग कल्चरसुद्धा उपलब्ध आहे. शेतकऱ्यांनी उपयोग करून घ्यावा. पाचट ठेवल्याने पाण्याचे बाष्पीभवन टाळता येते.

मल्चिगंमुळे तण नियंत्रण होते. आंतरमशागत खर्चात बचत होते. तुटलेल्या उसाचे बुडखे ‘मल्चर’च्या साहाय्याने छाटल्यानंतर नवीन फुटवा लागण उसासारखा जमिनीतून निघत असल्याने जोमदार येतो.’’

फुटून आलेल्या खोडवा उसावर जैविक व रासायनिक अन्नद्रव्यांच्या ठरावीक अंतराने चार फवारण्या केल्या आणि खतांचा डोस पहारीने छिद्रे घेऊन दिल्यानंतर उसाची वाढ चांगल्या प्रकारे होते. या खोडवा उसाला नियमित पाणी, खतमात्रा दिल्यानंतर खोडव्याचे कमी खर्चात अपेक्षित उत्पादन येण्यास मदत झाल्याचेदेखील त्यांनी सांगितले. जोपर्यंत एकरी ४० टन खोडवा उत्पन्न निघत राहील, तोपर्यंत ४ ते ५ खोडवा पिके घेणे हे फायदेशीर आहे.’’ ऊस विकास प्रतिनिधी अविनाश येवले यांनी स्वागत केले.