Buldana News : डिजिटल इंडिया भूमी अभिलेख आधुनिकपण कार्यक्रमांतर्गत शेतकरी व नागरिकांसाठी शेतजमिनीसंदर्भातील ११ प्रकारच्या फेरफार नोंदी ऑनलाइन करण्याची सुविधा ई-हक्क प्रणालीद्वारे उपलब्ध करून दिली आहे.

या प्रणालीद्वारे नागरिक व शेतकऱ्यांना शेतजमिनीचे फेरफार नोंदी करणे सुलभ होणार असून ई-हक्क प्रणालीचा जास्तीत जास्त लाभ घ्यावा, असे आवाहन जिल्हाधिकारी डॉ. किरण पाटील यांनी केले आहे.

नागरिकांना सेवांसाठी शासकीय कार्यालयामध्ये जाऊन कागदपत्रे सादर करावी लागतात. नागरिकांचा हा त्रास कमी व्हावा आणि त्यांना कालमर्यादेत नोंदी उपलब्ध होण्यासाठी शासनाने ई-हक्क प्रणाली कार्यान्वित केली आहे. या प्रणालीद्वारे विविध प्रकारच्या ११ प्रकारची फेरफार नोंदीसाठी ऑनलाइन सुविधा उपलब्ध करून दिली आहे.

नागरिकांना या सेवेचा लाभ घेण्यासाठी pdeigr.maharashtra.gov.in/frmLogin या संकेतस्थळावर जाऊन नोंदणी करावी लागते. संकेतस्थळावर नोंदणीची सुविधा उपलब्ध आहे. तेथे नोंदणी केल्यानंतर युजर आयडी व पासवर्ड टाकून विहित माहिती भरावी.

ई-हक्क प्रणालीवर ई-करार नोंदी, बोजा चढविणे/गहाणखत, बोजा कमी करणे, वारस नोंद, मृतांचे नाव कमी करणे, नोंद कमी करणे, विश्वस्तांचे नाव बदलणे, खातेदाराची माहिती भरणे, हस्तलिखित व संगणकीकृत सातबारामध्ये तफावत दुरुस्ती करणे व मृत कुळाची वारस नोंद अशा विविध प्रकारच्या ११ फेरफार सुविधा शेतकऱ्यांना करता येतील. अधिक माहितीसाठी शेतकऱ्यांनी संबंधित तहसीलदार, मंडळ अधिकारी, ग्राम महसूल अधिकारी यांचे कार्यालयास संपर्क साधावा.