Pune News : देशासह राज्यभरात दिवाळीच्या चैतन्यदायी पर्वानिमित्त सर्वत्र उत्साह आहे. मोठ्या शहरांपासून गावखेड्यापर्यंत बाजारपेठा गजबजल्या आहेत. लांबलेली खरीप काढणी, होऊ घातलेली रब्बी पेरणी एकाच टप्प्यात आल्याने शेतकऱ्यांची अजूनही शिवारातच लगबग सुरू आहे. पावसाने पिकांचे नुकसान केले असले, तरी जे हाती येईल, त्यास चांगला भाव मिळावा या अपेक्षेत बळिराजा आहे.

यंदा मॉन्सूनच्या दमदार पाऊसमानामुळे समाधान व्यक्त होत आहे. जेथे पावसाचा फटका बसला नाही, त्या भागात खरीप पिकांचे चांगल्या उत्पादनाची आशा शेतकऱ्यांना आहे.

दिवाळीच्या निमित्ताने काही भागात विशेषतः फूल उत्पादक शेतकऱ्यांना चांगले उत्पादन आणि दर मिळत आहे. भाजीपाला, फळभाज्यांना समाधानकारक दर असला, तरी पावसामुळे कमी उत्पादन घटीचे मुख्य कारण त्यामागे आहे.

दिवाळीच्या मुहूर्तावर कपडे, सोने, वाहने, धार्मिक पूजा साहित्य खरेदीसाठी बाजारपेठांत ग्राहकांची मोठ्या प्रमाणावर गर्दी होत आहे. ग्राहकांनी दुकाने गजबजली आहेत. वर्षभराच्या नोंदीसाठी व्यापाऱ्यांना लागणाऱ्या चोपड्या, पूजेसाठी फुले, उसाचे धाट, केळीचे खुंट, लक्ष्मीची प्रतिमा-पावले आदी पूजेचे साहित्य खरेदी करत लक्ष्मी पूजन, पाडवा सणासाठी नागरिकांसह व्यापारी, संस्था, कंपन्या सज्ज झाल्या आहेत.

वाहन खरेदीसाठी देखील दुचाकी, चारचाकींसह ट्रॅक्टर, अवजारे खरेदीसाठी देखील बाजारपेठेत उत्साह आहे. दिवाळ फराळाचे काम संपले असून, सणाचा गोडवा या चवदार पदार्थांनी वाढवला आहे.