Chhatrapati Sambhajinagar News : कृषी तंत्रज्ञान व्यवस्थापन यंत्रणा (आत्मा) आणि ‘सकाळ-अॅग्रोवन’ यांच्या संयुक्त विद्यामाने आयोजित जिल्हा कृषी व धान्य महोत्सवाचे उद्‌घाटन शुक्रवारी (ता. १०) छत्रपती संभाजीनगरचे विभागीय कृषी सहसंचालक डॉ. तुकाराम मोटे यांच्या हस्ते करण्यात आले.

जिल्हा अधीक्षक कृषी अधिकारी प्रकाश देशमुख, आत्माच्या प्रकल्प संचालक धनश्री जाधव आदींसह छत्रपती संभाजीनगर, पैठण, फुलंब्री आदी तालुक्यांतील आत्मा कृषी विभागाचे अधिकारी कर्मचारी, शेतकरी उपस्थित होते.

या कृषी व धान्य महोत्सवामध्ये छत्रपती संभाजीनगर जिल्ह्यातील नऊ तालुक्यांतील शेतकरी उत्पादक गट, शेतकरी उत्पादक कंपन्या, पंतप्रधान अन्न प्रक्रिया सूक्ष्म उद्योगअंतर्गत वैयक्तिक लाभार्थी आदीचे मिळून ४० दालने थाटण्यात आली आहेत. विविध प्रकारची अन्नधान्ये, प्रक्रिया उत्पादनांची रेलचेल या ठिकाणी आहे.

या प्रदर्शनास विविध मान्यवरांनीही शेतकरी गट, शेतकरी उत्पादक कंपन्यांच्या दालनास भेट देऊन माहिती घेतली. छत्रपती संभाजीनगर शहर व जिल्ह्यातील शेतकरी, नागरिकांनी या प्रदर्शनात भेट देऊन शेतीमालाची खरेदी करावी, असे आवाहन आत्माच्या वतीने करण्यात आले आहे.