Nanded News : जिल्हा प्रशासनाने ५५० टन डिएपीचा संरक्षीत साठा (बफर स्टॉक) खुला केला आहे. जिल्ह्यातील सोळा तालुक्यांना एमएआयडीसी व डिएमओंच्या माध्यमातून या खताचे विरतण करण्यात आले आहे. यात धर्माबाद तालुक्याला सर्वाधीक शंभर टन तर बिलोली तालुक्यात दहा टन डिएपी वितरीत केला आहे.

आगामी खरीप हंगामासाठी शेतकऱ्यांकडून डिएपी खताची मागणी वाढली आहे. अनेक शेतकऱ्यांना डीएपी खत मिळत नसल्यामुळे जिल्ह्यात या खताची टंचाई जाणवत आहे. शेतकरी खरिपासाठी खते तसेच बियाणांची खरेदी करत आहेत. परंतु अनेक कृषी निविष्ठा विक्री केंद्रावर डीएपी उपलब्ध नसल्यामुळे शेतकऱ्यांना माघारी फिरावे लागत आहे.

यामुळे शेतकऱ्यांनी तालुका तसेच जिल्हास्तरावर शासकीय कार्यालय गाठून डीएपी उपलब्ध करुन देण्याची मागणी करत आहेत. यासोबतच राजकीय पदाधिकारी तसेच काही संघटनांनीही शेतकऱ्यांना डीएपी खत उपलब्ध करुण देण्याची मागणी केली होती. यामुळे जिल्हा प्रशासनाने महाराष्ट्र कृषी उद्योग विकास महामंडळाकडील २५५ टन तर जिल्हा पणन अधिकारी कार्यालयाकडील २९५ टन असा एकूण ५५० टन डीएपी जिल्ह्यात वितरित करण्याचे निर्देश दिले होते.

यानुसार कृषी विभागाने तालुकानिहाय मागणीनुसार वितरण तयार करुन डिएपी खत खुला केला आहे. हा खत शेतकऱ्यांना लवकर उपलब्ध व्हावा, यासाठी कृषी विभागाने नियोजन केले आहे. डिएपीच्या वितरणात धर्माबाद तालुक्याला तब्बल १०० टन खत खुला केला आहे. इतर १५ तालुक्यांना मात्र १० टन ते ५० टन या प्रमाणात वितरण केले आहे.

तालुकानिहाय डिएपी खताचे वितरण (वितरण टनांत)

अक्र, तालुका एमआयडीसी डिएमओ एकूण

१) धर्माबाद शून्य १०० १००

२) नायगाव ५० शून्य ५०

३) देगलूर ४० शून्य ४०

४) मुदखेड .१५ शून्य १५

५) किनवट २० शून्य २०

६) भोकर २० शून्य २०

७) उमरी २० २०

८) हदगाव २० शून्य २०

९) कंधार शून्य ३० ३०

१०) लोहा शून्य ४० ४०

११) मुखेड १५ २५ ४०

१२) बिलोली १० शून्य १०

१३) अर्धापूर २० १० ३०

१४) नांदेड शून्य ४० ४०

१५) माहूर शून्य १० १०

१६) हिमायतनगर १५ १० २५

एकूण २५५ २९५ ५५०