Amravati News : राज्यात महाएफपीसी प्रमोटर संस्था असलेल्या भारतीय बनावटीच्या पहिल्या ड्रोनची विक्री भंडारा येथील शांतीगंगा फार्मर प्रोड्युसर कंपनीला करण्यात आली. डॉ. पंजाबराव देशमुख कृषी विद्यापीठाच्या वतीने आयोजीत ॲग्रोटेक कृषी प्रदर्शनात कुलगुरू डॉ. शरद गडाख तसेच अकोला जिल्हाधिकारी अजित कुंभार यांच्या हस्ते कंपनीचे अध्यक्ष हेमंत पिकलमुंडे यांना ड्रोन प्रदान करण्यात आला.

डिपार्टमेंट ऑफ सिव्हील ऍव्हीऐशन (डिजीसीए) मान्यता प्राप्त पहिला भारतीय बनावटीच्या ड्रोनचे उड्डाण पंतप्रधान नरेंद्र मोदी यांनी ड्रोन दिदी कार्यक्रमाअंतर्गत केले होते. या ड्रोनचे ॲग्रीबोट उत्पादक, ॲग्री डिवाईन ॲग्री प्रो. कंपनी हे वितरक तर राज्यात महाएफपीसी प्रमोटर संस्था आहे.

राज्य शासनाकडून अनुदानावर हे ड्रोन उपलब्ध करुन देण्यात येत आहेत. त्यानुसार भंडारा जिल्ह्यातील धोप येथील शांतीगंगा फार्मर प्रोड्युसर कंपनीला ड्रोनची विक्री करण्यात आली. कुलगुरू डॉ. शरद गडाख, जिल्हाधिकारी अजित कुंभार यांच्या हस्ते कंपनीचे अध्यक्ष हेमंत पिकलमुंडे यांना ड्रोन प्रदान करण्यात आला.

या वेळी महाएफपीसीचे संचालक सुधीर इंगळे, कृषी विद्यापीठाचे जनसंपर्क अधिकारी डॉ. किशोर बिडवे, जयंत सवाई, अभिजित अहेर, राज ढोकणे, शैलेश देशमुख, एस. एस. इंगळे, सुमित इंगळे व शेतकरी उपस्थित होते.

अशी आहे क्षमता

दहा लिटर क्षमतेच्या या ड्रोनची किंमत साडेआठ लाख रुपये असून शासन योजनेतून ३५ टक्‍के अनुदान याकरिता आहे. सात मिनिटांत एक एकर फवारणी याव्दारे शक्‍य होते. या माध्यमातून फवारणीकामी कीटकनाशकासोबतच वेळेतही बचत होते. तीन वर्ष गॅरंटी तसेच दहा वर्ष वारंटी या संयंत्राची आहे, असे महाएफपीसीचे संचालक सुधीर इंगळे यांनी सांगितले.