Bhandara News : सध्या राज्यात मराठा आरक्षणाच्या प्रश्नावरून वातावरण तापलेले असताना भंडाऱ्यात आज शासन आपल्या दारी कार्यक्रमाचे आयोजन केले होते. व्यासपीठावर उपमुख्यमंत्री अजित पवार यांचे भाषण सुरू असताना अचानक प्रेक्षकांमधून गोंधळ सुरू झाल्याने एकच खळबळ उडाली.

मराठा समाजाला कुणबी जात प्रमाणपत्र देण्याचा मागणीसाठी मराठा समाज आक्रमक झाला आहे. गावागावांमध्ये लोकप्रतिनिधींना बंदी घालण्यात आली. त्यामुळे महाराष्ट्र सरकारच्यावतीने शासन आपल्या दारी कार्यक्रमाला स्थगिती देण्यात आली.

काही दिवसांच्या खंडानंतर आज भंडाऱ्यात शासन आपल्या दारी या कार्यक्रमाचे आयोजन केले होते. या कार्यक्रमात मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार यांनी हजेरी लावली.

कार्यक्रमादरम्यान, अजित पवार यांनी भाषणाला सुरुवात केली. ते सरकारच्या विविध योजनाची माहिती देत असताना अचानक काही तरुणांनी घोषणाबाजी करायला सुरुवात केली. आरक्षणाची मागणी पूर्ण करा, नाहीतर खुर्च्या खाली करा, असी घोषणा देत हातातील बॅनर फडकावले .

कार्यक्रमात एकच गोंधळ झाल्याने पोलिसांनी तात्काळ संबंधितांना ताब्यात घेऊन बाहेर नेले. त्यामुळे काही काळ वातावरण तणावाचे बघायला मिळाले.