Jalgaon District Bank : जळगाव जिल्हा बँकेचे नवनिर्वाचित अध्यक्ष संजय पवार (Sanjay Pawar) यांच्या अध्यक्षतेखाली सोमवारी (ता. १०) होणाऱ्या पहिल्याच बैठकीला १६ संचालकांनी दांडी मारल्याने ही बैठक तहकूब करावी लागली. ही तहकूब बैठक पुन्हा शनिवारी (ता. १५) होणार आहे.
जळगाव जिल्हा मध्यवर्ती सहकारी बँकेच्या (Jalgaon District Central Cooperative Bank) नुकत्याच झालेल्या अध्यक्षपदाच्या निवडणुकीत शिंदे गट, भारतीय जनता पक्षाच्या मदतीने राष्ट्रवादी कॉंग्रेसचे संजय पवार अध्यक्ष झाले.
राष्ट्रवादीचे जिल्हाध्यक्ष ॲड. रवींद्र पाटील यांचा पराभव झाला. हा पराभव आमदार एकनाथ खडसे यांच्यासाठी मोठा धक्का ठरला. त्यामुळे संचालक मंडळात मोठे राजकारण चालणार असल्याचे संकेत मिळाले होते, त्याचा प्रत्यय आला.
१६ संचालक अनुपस्थित
अध्यक्ष निवडीनंतर जिल्हा बँकेच्या संचालक मंडळाची पहिलीच बैठक सोमवारी (ता. १०) दुपारी दोनला होती. बैठकीत पीक कर्जवाटप, वसुली यांसह शेतकरी हिताचे विषय चर्चेसाठी होते. मात्र बैठकीकडे तब्बल १६ संचालकांनी पाठ फिरविली. यात शिंदे गटाचे तीन संचालक आमदार अयोध्या येथे गेल्याने ते अनुपस्थित राहिले.
बैठकीसाठी अध्यक्ष संजय पवार, उपाध्यक्ष अमोल पाटील यांच्यासह संचालक मेहताबसिंग नाईक, प्रताप हरी पाटील, शैलजा निकम, जनाबाई महाजन, कार्यकारी संचालक जितेंद्र देशमुख उपस्थित होते. बैठकीसाठी ११ संचालकांचा कोरम आवश्‍यक होता. हा कोरम पूर्ण न झाल्याने ही बैठक तहकूब करण्यात आली.
संचालकांवर नेत्यांचा दबाव : पवार
अध्यक्षपदाच्या निवडीत झालेला पराभव जिल्ह्यातील राष्ट्रवादीच्या नेत्यांना जिव्हारी लागला. त्यामुळे दोन मोठ्या नेत्यांनीच इतर संचालकांना फोन करून दबाव आणत संचालक मंडळाच्या बैठकीला जाण्यास मज्जाव केल्याचा आरोप अध्यक्ष पवार यांनी पत्रकारांशी बोलताना केला.
होय, मीच संचालकांना रोखले : आमदार खडसे
जिल्हा बँकेच्या संचालक मंडळाच्या बैठकीसाठी कोरम पूर्ण करण्याची जबाबदारी सत्ताधाऱ्यांची आहे. आम्ही विरोधात आहोत. त्यामुळे बैठकीला जायचे की नाही, हे आमचे आम्ही ठरवू. सोसायट्यांना थेट पतपुरवठा या विषयावरून अनेकांची नाराजी आहे.
त्यामुळे मीच संचालकांना फोन करून बैठकीला जाऊ नका, असे सांगितल्याची माहिती आमदार एकनाथ खडसे यांनी दिली. सत्ताधारी संचालक सहकारी अयोध्येला वारी करीत आहेत. शेतकऱ्यांपेक्षा अयोध्येची वारी त्यांना महत्त्वाची वाटली का, असा सवालही त्यांनी केला.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.